«ديكي ارمان» مەن قايرات قۇدايبەرگەننىڭ ءىسى نەگە ۇزاققا سوزىلدى - جوعارعى سوت جاۋابى
استانا. KAZINFORM - جوعارعى سوت قىلمىستىق ىستەر جونىندەگى سوت القاسىنىڭ ءتوراعاسى نازگۇل راحمەتۋللينا پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرىنە بەرگەن سۇحباتىندا قاڭتار وقيعاسىنا بايلانىستى ايىپتالعان «ديكي ارمان» مەن قايرات قۇدايبەرگەنوۆتىڭ ءىسى نەگە ۇزاققا سوزىلىپ جاتقانى تۋرالى پىكىر ءبىلدىردى.

«ديكي ارمان» مەن ق. قۇدايبەرگەنوۆتىڭ ءىسى نەگە تىم ۇزاق ءجۇرىپ جاتىر؟ قاڭتار توڭكەرىسىنىڭ ۇيىمداستىرۋشىلارى رەتىندە ك. ءماسىموۆتى، ۇ ق ك باسشىلىعىن سوتتاپ، س. ابىشيەۆكە شارتتى مەرزىم كەستى عوي. ال، «ديكي ارمان» مەن ق. قۇدايبەرگەننىڭ ءىسى ءالى بىتپەي جاتىر»، - دەپ سۇرادى جۋرناليست.
نازگۇل راحمەتۋلينانىڭ پايىمداۋىنشا، ماسەلە ءىستىڭ كۇردەلى بولۋىنا بايلانىستى اياقتالماي جاتىر.
«مەن ول ىسپەن تانىس ەمەسپىن جانە وعان قول جەتكىزە المايمىن. ويتكەنى ءىس باسقا ينستانتسيادا قارالىپ جاتىر. سوت وندىرىسىندەگى ىستەردىڭ ءبارى، العاشقى نە اپەللياتسيالىق ينستانتسياداعى ءىس بولسا دا، نە بولىپ جاتقانى تۋرالى بىزگە ەسەپ بەرمەيدى. ءار ينستانتسيا ءوز قىزمەتىن ابسوليۋتتى تاۋەلسىز جۇرگىزەدى. مەنىڭ بىلۋىمشە، ءيا، ءسىز ايتىپ وتىرعان ءىستىڭ ءوندىرىسى ءالى اياقتالماعان. اياقتالعان ساتتە، ارينە، اقپارات بولادى. ياعني، سوت تەرگەۋ ءجۇرىپ جاتىر دەگەن ءسوز. كەيبىر ىستەر ءبىر ەپيزودتان عانا تۇرادى. ءبىر عانا جابىرلەنۋشى مەن جالعىز كۋاگەر بولسا، بىرنەشە وتىرىستان كەيىن ءىستى اياقتاۋعا بولادى. ال، كەيبىر ىستەردە 50 سوتتالۋشى، 250 جابىرلەنۋشى بولادى. قىلمىستىق ءىستىڭ ماتەريالى وراسان بولسا، سوت ونىڭ ءبارىن تولىقتاي زەرتتەۋگە مىندەتتى. سوندىقتان مەن بۇل ءىستىڭ ناقتى قاشان اياقتالاتىنىن ايتا المايمىن»، - دەدى جوعارعى سوت وكىلى.
اۆتور
ەسىمجان ناقتىباي