ديدار قامي اتىراۋداعى حالىقارالىق ايتىستىڭ باس جۇلدەسىنە يە بولدى
اتىراۋدا سۇلتان بەيبارىستىڭ 800 جىلدىعىنا ارنالعان «ەرلىگى ەرەن ەر بابام!» اتتى حالىقارالىق ايتىس ءوتتى. ەكى كۇنگە سوزىلعان ايتىستىڭ باس جۇلدەسىن ديدار قامي يەلەندى، دەپ حابارلايدى قازاقپارات ءتىلشىسى.

حالىقارالىق ايتىسقا قازاقستاننان 11، قىرعىزستاننان 2، موڭعوليادان 1 اقىن قاتىستى.
ايتىسكەرلەردىڭ ماحامبەت اتىنداعى اكادەميالىق قازاق دراما تەاترىنداعى جىر بايگەسىن قازاقستان جازۋشىلار وداعىنىڭ باسقارما ءتوراعاسى مەرەكە قۇلكەنوۆ ءتوراعالىق ەتكەن قازىلار القاسى سارالادى.
ايتىس ەكى كۇنگە سوزىلدى. ەكىنشى كەزەڭگە 8 ايتىسكەر شىقتى.
قازىلار القاسىنىڭ شەشىمىمەن ايتىستىڭ باس جۇلدەسى - 1 ميلليون تەڭگە قاراعاندى وبلىسىنان قاتىسقان تاجىريبەلى اقىن ديدار قاميعا بەرىلدى. ال ءبىرىنشى جۇلدەگە - 750 مىڭ تەڭگەگە ەركەبۇلان قاينازار (استانا) يە بولدى.
وزىندىك ءسوز ساپتاۋى، مانەرى بار ونەربەك داۋلەكەنوۆ (اتىراۋ وبلىسى) ەكىنشى جۇلدەنىڭ 600 مىڭ تەڭگەسىن يەلەندى. ال، ءۇشىنشى جۇلدە - 500 مىڭ تەڭگە ەكى ايتىسكەرگە بەرىلدى. ونىڭ ءبىرى - باتىس قازاقستان وبلىسىنىڭ تۋماسى تالعات مىقي، ال ەكىنشىسى - قىرعىزىستاننان كەلگەن ەسەنبەك كييزبايەۆ.
سونداي- اق، باتىرجان كادىرباي (اتىراۋ وبلىسى)، راۋان قايداروۆ (پاۆلودار وبلىسى)، باۋىرجان شيرمەدين ۇلى (باتىس قازاقستان وبلىسى) ارنايى جۇلدەنى يەمدەندى.
"كورەرمەن ايتىستىڭ قىزىقتى وتكەنىن قالايدى. قارسىلاسى مىقتى بولسا، ايتىسكەرلەر دە اشىلا تۇسەدى. شابىتى ويانادى. مەملەكەت باسقارعان تاريحي تۇلعا سۇلتان بەيبارىس بابامىزعا ارنالعان حالىقارالىق ايتىس جوعارى دەڭگەيدە، ءارى ءادىل ءوتتى. اتىراۋدا وتكەن ايتىستان ەكىنشى رەت باس بايگە الىپ تۇرمىن"، - دەدى ديدار قامي.
ال قىرعىزستاننان كەلگەن ەسەنبەك كييزبايەۆتىڭ ايتۋىنشا، مۇنداي حالىقارالىق ايتىس كوبىرەك وتكەنى ءجون.
"قازاق پەن قىرعىزدىڭ دوستىعىن جىرعا قوستىم. ويتكەنى ەكى ەلدىڭ اقىن- جازۋشىلارى ءبىر- ءبىرىنىڭ شىعارماشىلىعىن قولداعانىن بىلەمىز. ءبىز دە سول جولدى جالعاعىمىز كەلەدى"، - دەدى ەسەنبەك كييزبايەۆ.
اۆتور
جولداسبەك شوپەعۇل