دوپينگ قولدانعان سپورتشىنىڭ باپكەرى دە جاۋاپقا تارتىلادى - ەلسيار قاناعاتوۆ

Допинг қолданған спортшының бапкері де жауапқа тартылады
Фото: olympic.kz

استانا. KAZINFORM - وليمپيادا ويىندارىنا ليتسەنزيا جەڭىپ العان سپورتشىلار جارىسقا ادال قاتىسۋى كەرەك. «دوپينگ قولدانىپ، چەمپيون بولامىن» دەگەن ويدان ارىلاتىن ۋاقىت جەتتى.

بۇل تۋرالى Kazinform تىلشىسىنە بەرگەن سۇحباتىندا وليمپياداعا دايىندىق شتابىنىڭ جەتەكشىسى ەلسيار قاناعاتوۆ ايتىپ بەردى.

«پاريج وليمپياداسىنىڭ باستالۋىنا ساناۋلى كۇندەر قالدى. بۇگىنگە دەيىن ەل سپورتشىلارى 17 سپورت تۇرىنەن 50 جولداما جەڭىپ الدى. ەندى وسى ليتسەنزياعا قول جەتكىزگەن ويىنشىلارىمىز دوپينگ قولدانىپ قويۋدان ەرەكشە ساقتانۋى ءتيىس. بۇل ماسەلەنى ءار سپورتشىنىڭ جەكە باپكەرلەرى دە باستى نازاردا ۇستاۋى كەرەك. ەگەر شاكىرتى تيىم سالىنعان پرەپاراتتار قولدانعان جاعدايدا، باپكەرلەرى دە جاۋاپ بەرەتىن بولادى. سەبەبى بۇگىنگى تاڭدا ديرەكسيا تاراپىنان ولاردىڭ بارلىعى وقۋ-جاتتىعۋ جيىندارىمەن تولىق قامتاماسىز ەتىلدى. سونداي-اق، مەدالدار مەن ليتسەنزيالارعا ۇمىتكەر سپورتشىلاردىڭ ماتەريالدىق جاعدايىن قولداۋ ءۇشىن كەلىسىمشارتتار سوماسى دا ۇلعايتىلدى. قايدا بارسا دا، سپورتتىق كيىم، جايلى جاتار ورىن، تاماق، جولاقىلارى، بارلىعى مەملەكەتتىڭ قارجىسىمەن قامتاماسىز ەتىلگەن. وسىنداي قولداۋدى سەزىنە تۇرىپ، دوپينگ داۋىنا ىلىككەن سپورتشىلارعا كەشىرىم جوق»، - دەدى ەلسيار قاناعاتوۆ.

ەستەرىڭىزگە سالا كەتەيىك، XXXIII جازعى وليمپيادا ويىندارى فرانسيا استاناسى پاريج قالاسىندا 26-شىلدە-11-تامىز ارالىعىندا وتەدى.

ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور

كۇنسۇلتان وتارباي

سوڭعى جاڭالىقتار