دونالد ترامپ تيكتوك اككاۋنتىن اشتى

استانا. KAZINFORM – ا ق ش- تىڭ بۇرىنعى پرەزيدەنتى دونالد ترامپ قىتايلىق ByteDance كونسەرنىنە تيەسىلى TikTok الەۋمەتتىك جەلىسىندە اككاۋنت اشتى.

بۇل تۋرالى جەكسەنبى، 2-ماۋسىمدا ترامپ ءوز اككاۋنتىندا العاشقى ۆيدەو جاريالاعان كەزدە بەلگىلى بولدى. بۇل تۋرالى dw.com سايتى جازدى.

ۆيدەو نيۋركتە وتكەن ارالاس جەكپە-جەك حالىقارالىق Ultimate Fighting Championship (UFC) ۇيىمى ءىس- شارالارىنىڭ بىرىندە تۇسىرىلگەن. بەينەجازبادا UFC باس ديرەكتورى دانا ۋايت تا كورىنەدى. ۆيدەونىڭ باسىندا ول «پرەزيدەنت قازىر TikTok-تا» دەپ مالىمدەيدى، ال ترامپ بۇعان «ۇلكەن مارتەبە» دەپ جاۋاپ بەرەدى. قىسقا ۆيدەونىڭ قالعان بولىگى ا ق ش- تىڭ بۇرىنعى پرەزيدەنتىنىڭ تريبۋنادا كورەرمەندەرگە قول بۇلعاپ، ولارمەن بىرگە سەلفي جاساعانى تۇسىرىلگەن كادرلاردان تۇرادى.

TikTok اككاۋنتى ترامپقا جاس اۋديتوريانى، سونىڭ ىشىندە ا ق ش-تىڭ الداعى پرەزيدەنتتىك سايلاۋى قارساڭىندا الەۋەتتى سايلاۋشىلاردى تارتۋعا كومەكتەسۋى مۇمكىن، دەپ جازادى Politico. 24 ساعاتتان از ۋاقىت ىشىندە ترامپتىڭ العاشقى ۆيدەوسى شامامەن 56 ميلليون رەت قارالىپ، ونىڭ اككاۋنتىنا 3 ميلليونعا جۋىق قولدانۋشى جازىلعان.

بىرنەشە اي بۇرىن ا ق ش- تىڭ قازىرگى پرەزيدەنتى دجو بايدەننىڭ سايلاۋالدى شتابى TikTok اككاۋنتىن اشتى - ونىڭ 340 مىڭعا جۋىق جازىلۋشىسى بار.

بايدەننىڭ سايلاۋالدى شتابىنىڭ TikTok-تا اككاۋنتى بولعانىنا قاراماستان، ا ق ش بيلىگى سوڭعى ايلاردا ەلدەگى الەۋمەتتىك جەلىنىڭ جۇمىسىن شەكتەۋگە تىرىستى. ساۋىردە بايدەن كونگرەسستىڭ ەكى پالاتاسى ماقۇلداعان زاڭعا قول قويدى. ول الەۋمەتتىك جەلىنىڭ قىتايلىق يەسىن ءبىر جىل ىشىندە ءوز بيزنەسىن قىتايلىق يۋريسديكسيادا ەمەس كومپانياعا ساتۋعا مىندەتتەدى. ايتپەسە، TikTok ا ق ش- تا بۇعاتتالۋى مۇمكىن.

TikTok باسشىلىعى سوتتا ا ق ش بيلىگىنىڭ تالاپتارىنا قارسى كۇرەسەتىنىن ايتتى.

دونالد ترامپ پرەزيدەنت كەزىندە ا ق ش- تا TikTok-قا تىيىم سالۋعا تىرىسقان. ءبىراق سوت ونىڭ شەشىمىنە توسقاۋىل قويدى.

اۆتور

ەلميرا ورالبايەۆا