دونالد ترامپ نيەۆاداداعى پارتيا ىشىلىك سايلاۋدا جەڭىسكە جەتتى
استانا. KAZINFORM – ا ق ش- تىڭ بۇرىنعى پرەزيدەنتى دونالد ترامپ نيەۆادا شتاتىنداعى ىشكى پارتيالىق سايلاۋدا سەنىمدى جەڭىسكە جەتىپ، رەسپۋبليكالىق پارتيادان ۇمىتكەر بولۋ جولىنداعى العا ۇمتىلۋىن جالعاستىردى.
بۇل ونىڭ ايوۆا، نيۋ- گەمپشير جانە ۆيرگين ارالدارىندا جەڭىسكە جەتكەننەن كەيىنگى ءتورتىنشى ءىرى جەڭىسى.
ترامپ جارىستى %97,6 داۋىسپەن جەڭدى، شتات اتىنان 26 دەلەگات الدى. ونىڭ جالعىز قارسىلاسى تەحاس بيزنەسمەنى جانە پاستور رايان بينكلي بولدى، ول نيەۆادا رەسپۋبليكاشىلارىنىڭ %2,4 داۋىسىن جيناعان.
ال باس باسەكەلەسى، ا ق ش- تىڭ ب ۇ ۇ- داعى بۇرىنعى ەلشىسى جانە وڭتۇستىك كارولينانىڭ بۇرىنعى گۋبەرناتورى نيككي حەيلي ەسىمى بيۋللەتەندە بولماعاندىقتان بىردە-ءبىر داۋىس الا المادى.
نيەۆاداداعى كانديداتتاردى ۇسىنۋ پروتسەسى ءبىرشاما كۇردەلى جانە ونى شتات ەمەس، ساياسي پارتيالار باسقارادى. ترامپ وداقتاستارىنان تۇراتىن نيەۆادا رەسپۋبليكالىق پارتياسى ەكى كانديدات اراسىندا ىشكى پارتيالىق سايلاۋ وتكىزۋگە شەشىم قابىلدادى، نيككي حەيلي نيەۆاداعا ءىس جۇزىندە ۋاقىت پەن رەسۋرستار جۇمسامادى.
حەيلي كۇرەس جالعاستىرۋعا انت بەردى. ول جانە ونىڭ كومانداسى وڭتۇستىك كاروليناعا كوبىرەك ۋاقىت پەن كۇش جۇمسادى، وندا حەيلي 6 جىل بويى شتات گۋبەرناتورى قىزمەتىن اتقاردى. دەگەنمەن، ساۋالنامالار ترامپتىڭ وڭتۇستىك كارولينادا 24-اقپاندا وتەتىن پرايمەريزدىڭ الدىندا الدا تۇرعانىن كورسەتتى.
ا ق ش- تاعى سايلاۋ 2024-جىلدىڭ 5-قاراشاسىنا بەلگىلەنگەن.
اۆتور
زارينا تۋعانبايەۆا
