دوكتورانتۋراعا 3,5 مىڭنان استام ۇمىتكەر تۇسۋگە ءوتىنىش بەردى

11- شىلدە مەن 3- تامىز ارالىعىندا دوكتورانتۋراعا ءتۇسۋ ەمتيحانىنا ءوتىنىش قابىلداندى.

ۇلتتىق تەستىلەۋ ورتالىعىنىڭ مالىمەتىنشە، ەمتيحاندى 3577 ۇمىتكەر تاپسىرادى.

ءتۇسۋ ەمتيحانىنىڭ كۇنى، ۋاقىتى، ورنى تۋرالى اقپارات تالاپكەردىڭ testcenter.kz سايتىنداعى جەكە كابينەتىندە «مەنىڭ ءىس- ارەكەتىم» بولىمىندە جاريالانعان.

ەمتيحانعا قاتىسۋ قۇنى - 21072 تەڭگە.

TOEFL ITP سەرتيفيكاتى بار تۇلعالار ەمتيحان باستالعانعا دەيىن اعىلشىن ءتىلىن بىلۋگە ارنالعان قوسىمشا تەستىلەۋدى (قوسىمشا تەستىلەۋ) تاپسىرادى.

قوسىمشا تەستىلەۋدى وتكىزۋ ورنى مەن ۋاقىتى تۋرالى اقپارات 5-تامىزدا تالاپكەردىڭ جەكە كابينەتىندە قولجەتىمدى بولادى. قوسىمشا تەستىلەۋگە قاتىسۋ قۇنى – 14162 تەڭگە.

تۇسۋشىلەر مىندەتتى تۇردە قازتەست سەرتيفيكاتىن جانە شەت ءتىلىن مەڭگەرگەنىن راستايتىن سەرتيفيكات ۇسىنۋى كەرەك.

2024 -جىلى شەت ءتىلىن مەڭگەرگەنىن راستايتىن سەرتيفيكاتتاردىڭ شەكتى دەڭگەيى B1-گە دەيىن تومەندەتىلدى جانە تىزىمگە TOEIC جانە Duolingo English Test سەرتيفيكاتتارى ەنگىزىلدى.

دوكتورانتۋراعا «ماگيستر» دارەجەسى جانە كەمىندە 9 (توعىز) اي ەڭبەك ءوتىلى بار نەمەسە مەديتسينا ماماندىقتارى بويىنشا رەزيدەنتۋرادا وقۋ بىتىرگەن ادامدار قابىلدانادى.

مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە دوكتورانتۋراعا ءتۇسۋ ءۇشىن شەكتى بال - 75 بال.