دەپۋتات سارايشىق كوشەسىنە جۇمابەك تاشەنوۆتىڭ اتىن بەرۋدى ۇسىندى

استانا. KAZINFORM - استانا قالاسىنىڭ ءماسليحاتى التىنشى اۋداندى سارايشىق دەپ اتاۋدى ماقۇلدادى. بۇل رەتتە ءماسليحات دەپۋتاتى باۋىرجان سمايلوۆ سول جاعالاۋداعى سارايشىق كوشەسىنىڭ اتاۋىن جۇمابەك تاشەنوۆ دەپ اۋىستىرۋدى ۇسىندى.

بۇعان دەيىن دەپۋتات جاڭا اۋدانعا جۇمابەك تاشەنوۆ ەسىمىن بەرۋدى ۇسىنعان ەكەن.

«بۇعان دەيىن دە الماتى اۋدانى قۇرىلدى، الماتى كوشەسى بولدى، سارى ارقا اۋدانى مەن سارى ارقا داڭعىلى بار. وزگە وڭىرلەردە دە قايتالاناتىن اتاۋلار بار. سوندىقتان بۇل ماسەلە (كوشە اتىن اۋىستىرۋ - رەد.) كۇن تارتىبىندە تۇرعان جوق. سارايشىقتىڭ ساياسي-يدەيالىق ماڭىزدىلىعىن ەسكەرە وتىرىپ، جاڭا اۋدان اتاۋى رەتىندە تاڭدادىق. ونوماستيكا زاڭدىلىعى بويىنشا كىسى ەسىمى ەلدىمەكەنگە، اۋدانعا، قالاعا بەرىلمەيدى»، - دەپ جاۋاپ بەردى استانا تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ.

ساكەن ەسىركەپ ەلوردادا ج. تاشەنوۆ اتىنداعى كوشە مەن مەكتەپ بار ەكەنىن، مەكتەپتە مۋزەي مەن ەسكەرتكىشى اشىلعانىن ەسكە سالدى.

ال دەپۋتات ءبىر قالاعا سارايشىق اتاۋى كوبەيىپ كەتكەنىن، سوندىقتان قازىرگى سارايشىق كوشەسىن تاشەنوۆ ەسىمىنە اۋىستىرۋ باستاماسىن كوتەردى.

«ەگەر سارايشىق اۋدانى اشىلسا، قونايەۆ كوشەسىمەن قاتار جاتقان سارايشىق كوشەسىنە جۇمابەك تاشەنوۆتىڭ ەسىمىن بەرەيىك. وڭ جاعالاۋداعى قازىرگى تاشەنوۆ كوشەسى وتە قىسقا. مۇنداي تۇلعاعا سول جاعالاۋدا ناقتى سارايشىق كوشەسى بەرىلسە، ادىلدىك سوندا بولادى»، - دەدى ءماسليحات دەپۋتاتى باۋىرجان سمايلوۆ.

اۆتور

ايجان سەرىكجان قىزى