دەپۋتات قىتايدا قازاقستان ۇنىن ساتاتىن وكىلدىك قۇرۋدى ۇسىندى
استانا. KAZINFORM - ءماجىلىس دەپۋتاتى مۇرات ەرگەشبايەۆ پرەمەر-ءمينيستردىڭ ورىنباسارى سەرىك جۇمانعاريننىڭ اتىنا دەپۋتاتتىق ساۋال جولداپ، وزبەكستان مەن قىرعىزستاننىڭ قازاقستان بيدايىنىڭ ەكسپورتىنا قانداي توسقاۋىل قويىپ وتىرعانىن ءمالىم ەتتى.
- قازاقستان استىق وڭدەۋشىلەر وداعىنىڭ اقپاراتىنا سايكەس استىق وندەيتىن 250 كاسىپورىن بار. ولاردىڭ ىشىندە ناقتى جۇمىس ىستەپ تۇرعان كاسىپورىندار سانى بۇگىندە 80-نەن اسپايدى. وسى 80 كاسىپورىن قۋاتتىلىعىنىڭ 35-45 پايىزىندا عانا جۇمىس جاساپ جاتىر ەكەن. بيدايدى وڭدەمەي شيكىزات رەتىندە سىرتقا ساتۋ ءۇردىسى دامىپ كەلەدى. ويتكەنى بيدايدى سىرتقا ساتۋ باعاسى ىشكى نارىققا قاراعاندا جوعارى، وعان قوسا ەكسپورتقا شىعاتىن بيدايعا ترانسپورتتىق سۋبسيديا بار، - دەپ باستادى دەپۋتات.
سونداي-اق، ول استىق وندىرىسىندە جىلدار بويى شەشىلمەي كەلە جاتقان جۇيەلى پروبلەمالاردى اتادى.
- قوسىمشا قۇن سالىعىنىڭ جىلدار بويى ۋاقتىلى قايتارىلماي كەلەدى. «Qaztrade» اكسيونەرلىك قوعامى كولىك شىعىندارىن وتەۋ باعدارلاماسىن جەتكىلىكسىز قارجىلاندىرماي، كاسىپورىندار بىرنەشە جىلداپ وتەماقىنى الا المادى. سالدارىنان ەلىمىز ۇن ونىمدەرىن ساتىپ كەلگەن ءداستۇرلى نارىقتار - وزبەكستان، تاجىكستان، قىرعىزستان ەلدەرىنەن ايىرىلىپ، تەك اۋعانستان قالىپ وتىر. كورشىلەرىمىز يمپورتتىق باجداردىڭ سارالانعان مولشەرلەمەسىن ەنگىزدى. وزدەرىنە سىرتتان كىرەتىن استىققا باج سالىعى %0 بولسا، ۇنعا %10 بەلگىلەپ وتىر. ەكسپورتتىق جانە ولارعا تەڭەستىرىلگەن وپەراتسيالارعا %0 ستاۆكا جاساپ، قوسىمشا قۇن سالىعىن 7 كۇن ىشىندە جەدەلدەتىپ قايتارۋ سياقتى قادامدار جاساپ، ءوز استىق وندىرۋشىلەرىن قولداپ وتىر، - دەدى مۇرات ەرگەشبايەۆ.
دەپۋتات قازاقستاندا استىق وڭدەۋشىلەر وداعى استىقتىڭ ىشكى نارىقتا ءوتۋىن ىنتالاندىرۋ ءۇشىن كولىك شىعىندارىن وتەۋدى ۇسىنىپ وتىرعانىن اتاپ ءوتتى.
- بۇل شارا ناتيجەسىندە استىق وڭدەيتىن كاسىپورىنداردى جانداندىرىپ، ءونىمدى وڭدەۋ پايىزى ءوسىپ، اۋىل شارۋاشىلىعى تاۋارىن وندىرۋشىدەن باستاپ ۇن ەكسپورتتاۋشىعا دەيىن ناقتى قولداۋ بەرەر ەدى. سونىمەن قوسا، قىتايدا جەكە بيزنەستىڭ قاتىسۋىمەن ساۋدا وكىلدىگىن قۇرىپ، مەملەكەتتىك ەكسپورتتىق كورپوراتسيا جۇمىسىن قايتا قاراستىرۋ ارقىلى وتاندىق استىق وندىرۋشىلەرگە كورشى ەل نارىعىن اشۋ قاجەت، - دەدى ول.
ەسكە سالساق، قازاقستان بيىل گرۋزياعا 80 مىڭ توننا بيداي ەكسپورتتاۋدى جوسپارلاپ وتىر.
اۆتور
ەسىمجان ناقتىباي
