دەپۋتات ق ق س- تى كوتەرۋگە قاتىستى: قارجى جۇگى تۇتىنۋشىعا تۇسەدى

استانا. KAZINFORM - ءماجىلىس دەپۋتاتى بەرىك بەيسەنعاليەۆ قوسىلعان قۇن سالىعى شەگىن كوتەرۋ ماسەلەسىنە قاتىستى ءبىرقاتار ۇسىنىس بەردى.

- بيۋدجەت داعدارىسى جىلدار بويى ءوسىپ كەلە جاتقانىن جانە ونىڭ جۇيەلى سەبەپتەرى بار ەكەنىن ءبارىمىز بىلەمىز. كۇردەلى جانە باتىل شەشىمدەر قابىلداۋدىڭ ۋاقىتى كەلدى دەگەندى ءجيى ەستيمىز. مەنىڭ ويىمشا، كوبى بۇل ويمەن كەلىسەدى، ءبىراق ءبىز نە كورىپ وتىرمىز. ۇكىمەت ءبىر مەزەتتە قوسىلعان قۇن سالىعىن كوتەرۋدى جانە ونىڭ تولەۋ شەگىن ازايتۋدى ۇسىندى. بۇل رەتتە، قوسىلعان قۇن سالىعى ەسەپكە الىنباي، اينالىمنان الىناتىن سالىق بولادى جانە بارلىق سوما تۇپكىلىكتى تۇتىنۋشىعا قوسىمشا قارجىلىق جۇكتەمە بولىپ، تاۋار باعاسىنا اسەر ەتەدى. سونداي-اق، بيزنەستىڭ بولشەكتەنىپ، كولەڭكەگە كەتۋ قاۋپى بار، - دەدى بەرىك بەيسەنعاليەۆ ۇكىمەت باسشىسىنىڭ اتىنا دەپۋتاتتىق ساۋال جولداي وتىرىپ.

حالىق قالاۋلىسىنىڭ مالىمدەۋىنشە، ۇكىمەت ەكونوميكانى دامىتۋعا، شەتەلدەن ينۆەستيتسيا تارتىپ، بيزنەستى دامىتۋ ءۇشىن قولايلى جاعداي جاساۋ قاجەت.

وسى ورايدا ءماجىلىس دەپۋتاتى ۇكىمەتتىڭ نازارىنا كەلەسى قادامداردى ۇسىنىپ وتىر.

- بىرىنشىدەن، بيۋدجەتتىڭ شىعىسى مەن كىرىسىن تەڭەستىرىپ، ءتيىمسىز شىعىنداردى وڭتايلاندىرۋ قاجەت؛

- ەكىنشىدەن، كولەڭكەلى بيزنەس سۋبەكتىلەرىن سالىق تولەۋشىلەر قاتارىنا بىرتىندەپ شىعارا وتىرىپ، ەكونوميكانىڭ ۇشتەن ءبىر بولىگىن قۇرايتىن كولەڭكەلى ەكونوميكانى ناقتى ەكونوميكاعا كوشىرۋ كەرەك؛

- ۇشىنشىدەن، ەكونوميكانىڭ ناقتى سەكتورىن قولداۋ جونىندەگى تاسىلدەردى قايتا قاراۋ قاجەت؛

- مەملەكەت ناقتى جۇمىس ورىندارىن بەرەتىن، قوسىلعان قۇنى جوعارى ونىمدەر شىعاراتىن كاسىپورىندارعا عانا قاراجات قۇيۋى قاجەت.

ودان ءارى بەرىك بەيسەنعاليەۆ ۇكىمەتتىڭ قوسىلعان قۇن سالىعى شەگىن كوتەرۋ جونىندەگى باستاماسىنا جەكە توقتالدى.

ءبىرىنشى. ۇكىمەت ماسەلەنى باسقا دا تاسىلدەر مەن ۇسىنىستاردى زەرتتەي وتىرىپ، جان-جاقتى قاراۋى كەرەك.

ەكىنشى. قازىر تالقىلانىپ جاتقان جاڭا سالىق كودەكسىنىڭ جوباسىندا جەڭىلدىكتەر بار، ونىڭ ورىندىلىعى ەل بيۋدجەتىندەگى قازىرگى سىن-قاتەردى ەسكەرە وتىرىپ قايتا قارالۋى ءتيىس.

ءۇشىنشى. حالىقپەن جۇمىس ىستەيتىن بيزنەس سۋبەكتىلەرى ءۇشىن بولشەك سالىق رەجيمىنىڭ ساقتالۋىن ەسكەرە وتىرىپ، شەكتى دەڭگەي قوسىمشا تالقىلاۋ قاجەت.

ءتورتىنشى. سالىقتى اكىمشىلەندىرۋ جۇمىسىن جاقسارتۋ، سالىقتان جالتارۋعا قارسى كۇرەستى كۇشەيتۋ وتە كەرەك. مۇنىڭ ءبارى بيۋدجەتتى تولىقتىرۋدا مۋلتيپليكاتيۆتى اسەر بەرەدى. بيزنەستەن سالىقتى كاسىپكەرلەرگە زيان كەلتىرمەيتىن مولشەردە الۋ كەرەك.

- جوعارىدا ايتىلعانداردى ەسكەرە وتىرىپ، ءماجىلىستىڭ سالىق ستاۆكالارىن ۇلعايتۋ جونىندەگى ۇكىمەتتىڭ باستامالارىن ەنگىزۋ كەزىندە ءبىزدىڭ ۇسىنىستاردى ەسكەرۋدى سۇرايمىز، - دەدى ءماجىلىس دەپۋتاتى بەرىك بەيسەنعاليەۆ.

بۇعان دەيىن ساۋدا جانە ينتەگراتسيا ۆيتسە-ءمينيسترى قايرات تورەبايەۆ ءماجىلىستىڭ وتىرىسىنان كەيىن قوسىلعان قۇن سالىعى وسسە، الەۋمەتتىك ماڭىزى بار تاۋارلاردىڭ باعاسىنا قالاي اسەر ەتەتىنىن ايتتى.

اۆتور

داۋلەت ىزتىلەۋ