دەپۋتات استاناداعى اقىلى تۇراقتاردا 30 مينۋت تەگىن تۇرۋ تەتىگىن ەنگىزۋدى ۇسىندى
استانا. KAZINFORM - ءماجىلىس دەپۋتاتى نارتاي سارسەنعالي ۇلى پرەمەر-ءمينيستردىڭ ءبىرىنشى ورىنباسارى رومان سكليارعا جولداعان ساۋالىندا استاناداعى اقىلى تۇراقتاردى قىسقارتىپ، العاشقى 30 مينۋتتى تەگىن ەتۋ تۋرالى ۇسىنىس تاستادى.
«باسقا تۇگىلى باس قالادا اتتاپ باسساڭ، اقى تولەۋگە تۋرا كەلەدى. سەبەبى العاشىندا ادام كوپ باراتىن ورتالىق جانە ىسكەرلىك اۋدانداردا اقىلى تۇراق بولادى دەگەن جەلەۋمەن باستالعان جوبا تۇتاس قالانى تۇتقىنعا الدى. قازىر استانادا 7216 اقىلى اۆتوتۇراق بار ەكەن، ونى جىل سوڭىنا دەيىن 10000-عا جەتكىزۋ جوسپارى بار ەكەن. سول اقىلى تۇراقتاردان الىناتىن اقشادا جەكەمەنشىك كومپانيانىڭ ۇلكەن ۇلەسى بار. ءار ساعاتى 100 تەڭگە. دەمالىس نەمەسە مەرەكە كۇندەرى تەگىن دەگەن جەڭىلدىكتى دە الىپ تاستاعان. اقىلى اۆتوتۇراقتاردىڭ اقىسىن تولەمەسەڭ، ايىپپۇل سالادى، سوماسى - 10000 تەڭگەدەن اسادى. ياعني، ازاماتتارىمىز 100 تەڭگە تولەمەگەن جاعدايدا، 10 مىڭ تەڭگە تولەۋگە ءماجبۇر. بۇل دەگەنىمىز 100 ەسە كوپ»، - دەدى دەپۋتات.
دەپۋتاتتىڭ ايتۋىنشا، كەيىنگى 4 جىلدا ازاماتتار استاناداعى اقىلى اۆتوتۇراقتارعا 725,9 ميلليون تەڭگە تولەگەن. سونىڭ 617,3 ميلليون تەڭگەسى جەكە سەرىكتەستىككە تۇسسە، 108,7 ميلليون تەڭگەسى عانا قالا بيۋدجەتىنە اۋدارىلعان.
«ال اۆتوتۇراقتاردى اباتتاندىرۋ، جولدى جوندەۋ جانە كوشەنى جيناۋ شىعىندارىن قالا اكىمدىگى كوتەرەدى. جەكە كومپانيانىڭ مىندەتى قانداي سوندا؟ العاشىندا اقىلى تۇراقتىڭ ارقاسىندا اۆتوتۇراقتاعى قوزعالىس جىلدامدىعى ازايادى، تۇراقتاردىڭ قولجەتىمدىلىگى ارتادى، كوشەلەردە كولىكپەن توقتاۋ ەرەجەلەرى رەتتەلەدى دەگەن. ولاي بولمادى ءبىراق. اقىلى اۆتوتۇراقتارعا كوممەرتسيالىق ورتالىقتار، قوعامدىق ورىندار ءتىپتى، قۇرىلىس نورمالارى مەن قاعيدالارىن بۇزا وتىرىپ الەۋمەتتىك وبەكتىلەرگە كەلۋشىلەرگە ارنالعان جەرلەر دە بەرىلدى. تۇرعىندارى ءتيىستى كوندومينيۋم راسىمدەپ ۇلگەرمەگەن تۇرعىن الاپتارى مەن تىنىش اۋدانداردا دا اقىلى تۇراقتار پايدا بولدى. استاناداعى ساياباقتار مەن تۇرعىن ءۇي كەشەندەرىنىڭ اينالاسىندا اقىلى تۇراقتان اياق الىپ ءجۇرۋ مۇمكىن ەمەس. حالىقتىڭ قالتاسىنا وسىنشا ءتۇسۋ زاڭدى ما؟» - دەپ سۇرادى دەپۋتات.
ونىڭ سوزىنشە، اقىلى اۆتوتۇراقتاردى كولىكتەر ەڭ كوپ جينالاتىن ىسكەرلىك اۋدانداردا عانا قالدىرىپ، قالعانىن قىسقارتۋ كەرەك.
«تۇرعىن ۇيلەر مەن ساياباقتاردىڭ اۋماعىندا اقىلى تۇراق بولماۋى قاجەت. اقىلى كولىك تۇراقتارىن قاداعالايتىن مەملەكەتتىك وپەراتوردى قۇرۋ كەرەك. وعان دەيىن مەملەكەت پەن جەكە مەنشىك سەكتوردىڭ سەرىكتەستىگى تۋرالى شارتتاردىڭ تالاپتارىن قايتا قاراپ، جەكەمەنشىك كومپانياعا تۇراق اۋماعىن كۇتىپ ۇستاۋ، جولىن جوندەۋ قىزمەتىن جۇكتەۋ قاجەت. اقىلى اۆتوتۇراقتا تەگىن تۇرۋ ۋاقىتىن كەمى 30 مينۋتقا جەتكىزۋ كەرەك»، - دەدى ءماجىلىس دەپۋتاتى.
ەسكە سالساق، استانا اكىمدىگى مەن اقىلى تۇراقتاردان اقشا جينايتىن كومپانيا اراسىنداعى كەلىسىمشارت 2038 -جىلعا دەيىن بەكىتىلگەن.
اۆتور
ەسىمجان ناقتىباي
