دۇنيەجۇزىلىك كوشپەندىلەر ويىنىندا ءار ءوڭىر بەس كيىز ۇيدەن تىگەد
استانا. KAZINFORM - استانا قالاسىندا وتەتىن V دۇنيەجۇزىلىك كوشپەندىلەر ويىندارى كەزىندە ەتنواۋىلدا ءبىر تۇستە، ءبىر قالىپتا ونداعان كيىز ءۇي تىگىلەدى.
بۇل تۋرالى بۇگىن تۋريزم جانە سپورت مينيسترلىگىندە دەنە شىنىقتىرۋ جانە سپورت، ويىن بيزنەسى مەن لوتەرەيا قىزمەتىن رەتتەۋ سالالارىنداعى 2023 -جىلعى قىزمەتى مەن 2024 -جىلعا قويىلعان نەگىزگى مىندەتتەرى تۋرالى كەڭەيتىلگەن القا ماجىلىستە V دۇنيەجۇزىلىك كوشپەندىلەر ويىندارىن ۇيىمداستىرۋ جانە وتكىزۋ ديرەكسياسى ديرەكتورىنىڭ ورىنباسارى ابىلاي قوندىبايەۆ ءمالىم ەتتى.
«V دۇنيەجۇزىلىك كوشپەندىلەر ويىندارى بيىلعى ەلوردامىزدا وتەتىن باستى وقيعالاردىڭ ءبىرى. ويىنداردىڭ باستالۋىنا 205 كۇن قالدى. ءبىز بارلىق دايىندىق جۇمىستارىن ءۇش كەزەڭگە بولگەن بولاتىنبىز. جوسپار بويىنشا ءبىرىنشى كەزەڭدى اياقتاپ، ەكىنشى كەزەڭدى باستاپ جاتىرمىز. بارلىق جۇمىس جوسپار بويىنشا ءجۇرىپ جاتىر. ويىندارعا 100-دەن استام مەملەكەتتەن 4000-عا جۋىق سپورتشى قاتىسىپ، استاناعا 100 مىڭنان استام تۋريست كەلەدى دەپ جوسپارلاپ وتىرمىز. اتالعان ويىندار كەزىندە ەتنو اۋىلعا ءار ءوڭىر بەس كيىز ۇيدەن تىگەدى»، - دەپ اتاپ ءوتتى ابىلاي قوندىبايەۆ.
سونداي-اق، كوشپەندىلەر ويىنىندا سپورتشىلار قانشا سپورت تۇرىنەن ب ا ق سىنايتىنىن دا تىلگە تيەك ەتتى.
«اسىق اتۋ، وردو، ارقان تارتىس، بايگە، كوكپار، اۋدارىسپاق، تەڭگە ءىلۋ، قازاق كۇرەسى، الىش، كۋراش، اشىرتمالى ابا گيۋرەشي، سسيرىم، ماس- رەستلينگ، Powerfull nomad (كۇشتىلەردىڭ سايىسى)، توعىزقۇمالاق، مانگالا، وۆاري، ءداستۇرلى ساداق اتۋ، جامبى اتۋ، قۇسبەگىلىكتەن سايىستار وتەدى. سونداي- اق، 10 كورنەكى سپورت سايىسىنان جارىستار وتكىزۋدى كوزدەپ وتىرمىز. دۇنيەجۇزىلىك كوشپەندىلەر ويىندارىنىڭ اشىلۋ سالتاناتى «استانا-ارەنا» ستاديونىندا، جابىلۋى 10 مىڭ ادامدىق «قازانات» يپپودرومىندا وتەدى دەپ جوسپارلانعان»، دەدى ول بايانداماسىندا.
ايتا كەتەيىك، V دۇنيەجۇزىلىك كوشپەندىلەر ويىنى بيىل 8-14-قىركۇيەك ارالىعىندا استانا قالاسىندا وتەدى.
اۆتور
كۇنسۇلتان وتارباي
