دۇنيەجۇزىلىك كوشپەندىلەر ويىندارى: ءدۇبىرلى دودا اياقتالدى
استانا. KAZINFORM - بەس كۇن بويى ەلوردا تورىندە دۇبىرلەپ وتكەن V دۇنيەجۇزىلىك كوشپەندىلەر ويىندارى جالاۋىن ءتۇردى. 21 سپورت تۇرىنەن سىنعا تۇسكەن 89 ەلدىڭ سپورتشىلارى ءوزارا كىل مىقتىنى انىقتاپ، تاريحتىڭ جاڭا پاراعى جازىلدى.
الىس-جاقىننان كەلگەن جانكۇيەرلەر جارىستىڭ جوعارى دەڭگەيدە ۇيىمداستىرىلعانىن جارىسا ايتىپ، رۋحاني جىگەر العانىن جەتكىزدى.
ءدۇبىرلى دودانىڭ جابىلۋ سالتاناتىندا ءسوز العان دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعان ق ر پرەزيدەنتى قاسىم-جومارت توقايەۆقا جارىستىڭ جوعارى دەڭگەيدە ۇيىمداستىرىلعانى ءۇشىن العىسىن ءبىلدىردى.
«قازاقستان تۇركى الەمىنە عانا ەمەس، بۇكىل الەمگە تۋىستاس حالىقتاردىڭ باۋىرمالدىعىن، ىنتىماقتاستىعىن پاش ەتە ءبىلدى. سپورتتىق ءىس-شارا ارقىلى تۇركىتىلدەس ەلدەردىڭ باي مادەنيەتى، سالت-ءداستۇرى ايرىقشا دارىپتەلدى»، - دەدى ول.
ق ر تۋريزم جانە سپورت ءمينيسترى ەربول مىرزابوسىنوۆ جارىستىڭ تارتىستى بولعانى سونشالىق، جۇلدەگەرلەردىڭ قاتارىندا ءارتۇرلى ەلدىڭ وكىلدەرى كوپ ەكەنىن اتاپ ءوتتى.
«قازاق توپىراعىندا ۇيىمداستىرىلعان ءدۇبىرلى دودا ءمانى تەرەڭ، مازمۇنى باي جارىس رەتىندە باعالانىپ جاتىر. بار الەمگە ۇلتتىق سپورتىمىز ۇلىقتالىپ، مادەنيەتىمىز ودان سايىن ناسيحاتتالدى. دودانىڭ تۇركى الەمىنىڭ التىن بەسىگى - قازاق جەرىندە ۇيىمداستىرىلۋى ءبىز ءۇشىن زور مارتەبە»، - دەدى مينيستر.
بۇدان كەيىن داستۇرگە ساي، V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسياسىنىڭ باسشىسى نايل نۇروۆ كيەلى سۋعا تولى تورسىقتى ق ر تۋريزم جانە سپورت ءمينيسترى ەربول مىرزابوسىنوۆقا تابىستادى. ال ول ءوز كەزەگىندە كەلەسى دۇنيەجۇزىلىك كوشپەندىلەر ويىندارىن قابىلدايتىن قىرعىزستان ەلىنىڭ وكىلىنە تابىس ەتتى. قىرعىز رەسپۋبليكاسىنىڭ مادەنيەت، اقپارات، سپورت جانە جاستار ساياساتى ءمينيسترى تورسىقتى توبەسىنە كوتەرىپ، قازاقستاندىقتاردى ەكى جىلدان كەيىن ۇيىمداستىرىلاتىن ءدۇبىرلى دودانىڭ مەيمانى بولۋعا شاقىردى.
ايتا كەتەيىك، V دۇنيەجۇزىلىك كوشپەندىلەر ويىندارىندا بارلىعى 97 مەدال جيىنتىعى ساراپقا سالىندى. جالپى كوماندالىق ەسەپتە قازاقستان كوش باستادى.
اۆتور
ورالحان قوجانوۆ
