دۇنيەجۇزىلىك كوشپەندىلەر ويىندارى باعدارلاماسىنا وزگەرىستەر ەنگىزىلدى

استانا. قازاقپارات- 5- دۇنيەجۇزىلىك كوشپەندىلەر ويىندارىنىڭ سپورتتىق باعدارلاماسى قىسقارتىلدى. سونداي-اق، ويىنداردىڭ باعدارلاماسىنان كورنەكى سپورت ءتۇرى جارىستارى الىنىپ تاستالدى. بۇل تۋرالى اتالعان ءىس-شارانى دايىنداۋ جانە وتكىزۋ ديرەكسياسى حابارلايدى.

پرەمەر-ءمينيستردىڭ ءبىرىنشى ورىنباسارى، V دۇنيەجۇزىلىك كوشپەندىلەر ويىندارىن ۇيىمداستىرۋ كوميتەتىنىڭ ءتوراعاسى رومان سكلياردىڭ توراعالىعىمەن ايتۋلى شاراعا دايىندىقتى قايتا پىسىقتاۋ تۋرالى كەڭەس ءوتتى.

كەڭەسكە سپورت جانە تۋريزم ءمينيسترى ەرمەك مارجىقپايەۆ، 5-دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسياسىنىڭ باسشىسى نايل نۇروۆ، مادەنيەت جانە اقپارات، قارجى مينيسترلىگى مەن استانا قالاسى اكىمدىگىنىڭ وكىلدەرى قاتىستى.

ديرەكسيا باسشىسى نايل نۇروۆ ويىندارعا دايىندىق بارىسى تۋرالى، سونداي-اق ق ر پرەزيدەنتى قاسىم-جومارت توقايەۆتىڭ بيۋدجەتتى قىسقارتۋ جونىندەگى تاپسىرماسىنىڭ ورىندالۋى تۋرالى تولىعىراق ايتىپ بەردى.

ەسكە سالا كەتەيىك، مەملەكەت باسشىسى ءبىرقاتار وڭىردەگى سۋ تاسقىنى جاعدايىن ەسكەرە وتىرىپ ۇكىمەتكە، ورتالىق مەملەكەتتىك جانە جەرگىلىكتى اتقارۋشى ورگاندارعا يميدجدىك ءىس-شارالاردان باس تارتۋدى جانە الدا وتەتىن كوشپەندىلەر ويىندارىنا جۇمسالاتىن شىعىندى قىسقارتۋدى تاپسىرعان ەدى.

پرەزيدەنت تاپسىرماسى بويىنشا 5- دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكسياسى سپورتتىق باعدارلاماعا وزگەرىستەر جانە ۇسىنىستار ەنگىزدى.

اتاپ ايتقاندا، ويىندار ءبىر كۇنگە قىسقارتىلىپ، 8-13-قىركۇيەك ارالىعىندا وتەدى.

«سسيرىم» ويىنى تولىعىمەن الىنىپ تاستالدى. «ماس- رەستلينگتەن» 4 سالماق دارەجەسى الىنىپ تاستالىپ، 8- ءى عانا قالدى. مەدالدار ەرلەر اراسىندا 5 سالماق دارەجەسى بويىنشا، ال ايەلدەر اراسىندا 3 سالماق دارەجەسىندە ويناتىلادى. «كوكپار» 6 كۇننەن 3 كۇنگە قىسقارتىلدى. «الىشتان» سالماق دارەجەلەرى ەكى ەسە قىسقارتىلدى. سونىمەن قاتار «قۇراشتان» 3 سالماق دارەجەسى الىنىپ تاستالدى. «ارقان تارتىس» تەك 2 سالماق دارەجەسى بويىنشا ەرلەر مەن ايەلدەر اراسىندا وتكىزىلەدى.

ودان بولەك، ويىنداردىڭ سپورتتىق باعدارلاماسىنا «كوكبورى» جانە «كورەش» قوسىلدى. قىرعىز ويىنا كوكبورى وليمپيادالىق جۇيە بويىنشا 3 كۇن ىشىندە وتكىزىلەدى. «كورەش» تاتار بەلدىك كۇرەسى تەك ەرلەر اراسىندا 4 سالماق دارەجەسىندە وتەدى.

سونداي-اق، كەڭەستە ەرىكتىلەردىڭ، ۇيىمداستىرۋ كوميتەتىنىڭ، تورەشىلەردىڭ مەن قىزمەتكەرلەردىڭ كيىم ۇلگىلەرى تانىستىرىلدى.

ەسكە سالا كەتەيىك، V دۇنيەجۇزىلىك كوشپەندىلەر ويىندارى استانادا وتەدى.

اۆتور

داۋلەت ىزتىلەۋ