دەنساۋلىق ساقتاۋ مينيسترلىگى قاراقۇرتتىڭ قاۋپى تۋرالى ەسكەرتتى
استانا. KAZINFORM – ق ر دەنساۋلىق ساقتاۋ مينيسترلىگى ورمەكشىلەردىڭ ماۋسىمدىق بەلسەندىلىگىنە بايلانىستى (شىلدەدەن قىركۇيەككە دەيىن) قاراقۇرت شاعۋىنىڭ الدىن الۋ شارالارىن ەسكە سالادى.
قاراقۇرتتاردىڭ جانە باسقا دا ۋلى ورمەكشىلەردىڭ شاعۋىن بولدىرماۋ ءۇشىن كەلەسى 5 ەرەجەنى ساقتاۋدى ۇسىنامىز:
- قورعانىس كيىمىن كيىڭىز: قاراقۇرت مەكەندەيتىن جەرلەردە ۇزىن شالبار مەن جابىق اياق كيىم (جانۋارلاردى ۇستاۋ ورىندارى جانە ت. ب.).
- كيىم مەن اياق كيىمدى كيەر الدىندا، اسىرەسە سىرتتا بولعاننان كەيىن تەكسەرىڭىز.
- قورعانىس قۇرالدارىن (ينسەكتيتسيدتەر) قولدانىڭىز.
- تازالىق ساقتاڭىز: قوقىستاردى ۋاقتىلى تازالاڭىز، ۋچاسكەنى جانە قوسالقى عيماراتتاردى ۇنەمى تەكسەرىپ وتىرىڭىز.
- ورمەكشىنى قولىڭىزبەن ۇستاماڭىز.
قاراقۇرت شاققاننان كەيىنگى بەلگىلەر: قاراقۇرت شاققاننان كەيىن 10-15 مينۋتتان كەيىن بۇكىل دەنەگە تارالاتىن قاتتى، ايقىن اۋىرسىنۋ پايدا بولادى. ينتوكسيكاتسيا بەلگىلەرى جوعارىلايدى: جۇرەك سوعىسى، ەنتىگۋ، باس اۋرۋى، جۇرەك اينۋ، قۇسۋ، بەتتىڭ قىزارۋى، تەرشەڭدىك.
قاراقۇرت شاعىپ العان جاعدايدا دەرەۋ جاقىن جەردەگى مەديتسينالىق ۇيىمعا مەديتسينالىق كومەككە جۇگىنۋ قاجەت.
بۇگىنگى تاڭدا ادامداردى قاراقۇرتتىڭ شاعۋ جاعدايلارى شىمكەنت قالاسىندا جانە اتىراۋ وبلىسىندا تىركەلگەن، شاعىپ العان ادامدار ءتيىستى مەديتسينالىق كومەك الدى. جەرگىلىكتى اتقارۋشى ورگاندار پروفيلاكتيكالىق دەزينسەكسيانى ۇيىمداستىرۋ جانە جۇرگىزۋ جونىندە شارالار قابىلداۋدا.
انىقتاما: قاراقۇرت - الەمدەگى ەڭ قاۋىپتى دەپ سانالاتىن ورمەكشى. قاراقۇرتتىڭ ۋى - توكسالبۋمين. ول نەيروتوكسيكالىق، ليمفا جۇيەسى ارقىلى تەز تارالادى. بۇل شىلدىر جىلاننىڭ ۋىنان 15 ەسە ۋلى.
وسىعان دەيىن باياناۋىلداعى تۋريستىك ورىنداردا قاراقۇرت قاپتاپ كەتكەنى حابارلاندى.
كەيىنىرەك باياناۋىلدا قاراقۇرت قاپتاۋىنا بايلانىستى تابيعي سيپاتتاعى توتەنشە جاعداي جاريالانۋى مۇمكىن ەكەنى ايتىلدى.
سونداي- اق اتىراۋ وبلىسىندا قاراقۇرت شاققان 485 تۇيەنىڭ توقسانى ولگەنى ايتىلدى.
