دەمالىس كەزىندە ستۋدەنتتەرگە تابىس تابۋعا مۇمكىندىك بەرىلەدى
استانا. KAZINFORM – ق ر ەڭبەك جانە حالىقتى الەۋمەتتىك قورعاۋ مينيسترىلىگى اۋىلدا جۇمىسپەن قامتۋدىڭ جاڭا فورمالارىن ەنگىزۋگە قاتىستى تۇسىنىك بەردى.
«قازىرگى كەزدە مينيسترلىك مۇددەلى مەملەكەتتىك ورگاندارمەن جانە ۇيىمدارمەن بىرلەسىپ ماۋسىمدىق جانە ۆاحتالىق جۇمىستاردى ورىنداۋعا جۇمىسكەرلەردى تارتۋعا، سونداي-اق وڭىرلەردە موبيلدى كاسىپكەرلىكتى دامىتۋعا بايلانىستى جاڭا تاسىلدەردى ازىرلەپ جاتىر. ونىڭ اياسىندا ءتيىستى قادامدار ەسكەرىلگەن. بىرىنشىدەن، جۇمىسپەن قامتۋعا جاردەمدەسۋ قۇرالدارى ارقىلى جۇمىس بەرۋشىلەردى ىنتالاندىرۋ جولىمەن ەڭبەكاقىسى تومەن ءارى نەعۇرلىم تالاپ ەتىلەتىن جۇمىسشى كاسىپتەرىنە سۋبسيديالاۋ مۇمكىندىگى قاراستىرىلىپ وتىر. ەكىنشىدەن، دايىن بيزنەس يدەيالاردىڭ ۇتقىرلىعى ەسەبىنەن كاسىپكەرلىك باستامالاردى كەڭەيتۋ مۇمكىندىگى بار. ۇشىنشىدەن، جازعى دەمالىس كەزىندە ستۋدەنتتەرگە قوسىمشا تابىس تابۋ مۇمكىندىگىن بەرۋ»، - دەلىنگەن ەڭبەك مينيسترلىگىنىڭ Kazinform اگەنتتىگىنە بەرگەن جاۋابىندا.
ۆەدومستۆو اقپاراتىنا قاراعاندا، مۇنداي وزگەرىستەر اۋىل شارۋاشىلىعىن دامىتۋعا، ەڭبەك نارىعىنىڭ سۇرانىسىنا باعىتتالعان ءونىمدى جۇمىسپەن قامتۋعا جاڭا سەرپىن بەرەدى. سونىمەن قاتار، وندىرىلگەن ءونىم كولەمىن ۇلعايتۋعا اسەر ەتەتىن بيزنەس- باستامالاردى كەڭەيتۋ ەسكەرىلگەن.
«قازىرگى ۋاقىتتا ۇلتتىق ەكونومكا، اۋىل شارۋاشىلىعى، عىلىم، سيفرلىق دامۋ مينيسترلىكتەرى، سولتۇستىك وڭىرلەردىڭ اكىمدىكتەرى جانە «اتامەكەن» ۇ ك پ- مەن جوعارىدا اتالعان تاسىلدەر بويىنشا شوعىرلاندىرىلعان ۇستانىمدى ازىرلەۋ بويىنشا جۇمىس جالعاسىپ جاتىر»، - دەپ اتالىپ وتكەن مينيسترلىك مالىمەتىندە.
بۇدان بۇرىن حابارلانعانداي، ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا اۋىل شارۋاشىلىعىندا جۇمىسپەن قامتۋدىڭ جاڭا ەرەجەلەرى قابىلداناتىنىن ايتتى.
اۆتور
رۋسلان عابباسوۆ
