دارىگەرگە جازىلۋعا بىرنەشە اپتا كەرەك -ءماجىلىس ءتوراعاسىنىڭ ورىنباسارى

مىندەتتى الەۋمەتتىك مەديتسينالىق ساقتاندىرۋ جۇيەسى ناقتى ناتيجەسى بايقالماي تۇر. بۇل تۋرالى ءماجىلىس ءتوراعاسىنىڭ ورىنباسارى دانيا ەسپايەۆا ايتتى، دەپ حابارلايدى قازاقپارات ءتىلشىسى.

«مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزگەن كەزدە، ۇكىمەت بۇل مودەل كورسەتىلەتىن مەديتسينالىق قىزمەتتىڭ ءتىزىمىن كەڭەيتۋدى جانە ونى ءار ازامات ءوزى قالاعان جەردە كەز كەلگەن ۋاقىتتا الۋى مۇمكىندىگىن قامتاماسىز ەتەتىنىن ايتقان ەدى. وسىلايشا «اقشا پاتسيەنتتىڭ سوڭىنان ەرەدى» قاعيداتى ورىندالۋى كەرەك ەدى. الايدا قازىر ناقتى ناتيجەسى كەرىسىنشە ەكەنىن بايقادىق»، - دەدى د. ەسپايەۆا پارلامەنت ماجىلىسىندە ءوتىپ جاتقان ۇكىمەت ساعاتىندا.

ونىڭ ايتۋىنشا، دەپۋتاتتاردىڭ حالىقپەن كەزدەسۋىندە ازاماتتاردان مەديتسينالىق قىزمەتتەردىڭ ساپاسىنا قاتىستى كوپتەگەن شاعىم ءتۇسىپ جاتىر.

«بۇل رەتتە، ادامدار ەمحانالاردا ۇزىن- سونار كەزەك بار ەكەنىن ۇنەمى ايتىپ ءجۇر. ال ناقتى دارىگەر مامانعا جازىلۋ ءۇشىن بىرنەشە اپتا، ءتىپتى ايلاپ كۇتۋ كەرەك. كەيبىر جاعدايدا دارىگەرگە ۋاقىتىندا جەتە الماي، اقىلى قىزمەتكە جۇگىنىپ، ارتىق شىعىنعا تاپ بولادى. وسىنىڭ سالدارىنان تۇرعىندار «ساقتاندىرۋ جارناسىن نە ءۇشىن تولەيمىز؟ ونىڭ قانداي ارتىقشىلىعى بار؟» دەگەن سۇراقتاردى جاۋدىرىپ جاتىر. ادامداردىڭ كوبىسى ساقتاندىرۋ جۇيەسىندە بولماعاندىقتان، ولارعا جەكەلەنگەن قىزمەتتەر كورسەتىلمەيدى. قازىر شۇعىل مەديتسينالىق قىزمەتكە جۇگىنۋگە ءماجبۇر 3 ميلليوننان استام ادام ساقتاندىرۋ جۇيەسىنەن تىس قالعان. بۇل ءوز كەزەگىندە اۋرۋدىڭ اسقىنۋىنا الىپ كەلەدى»، - دەدى ءماجىلىس ءتوراعاسىنىڭ ورىنباسارى.

بۇدان بۇرىن حابارلانعانداي، دەنساۋلىق ساقتاۋ ءمينيسترى اجار عينيات ەل ازاماتتارى ءوز دەنساۋلىعىنا قانشا قاراجات جۇمسايتىنىن ايتتى.

اۆتور

رۋسلان عابباسوۆ