«دارىن» مەملەكەتتىك جاستار سىيلىعىنا بايقاۋ جاريالاندى
استانا. KAZINFORM - «دارىن» مەملەكەتتىك جاستار سىيلىعىنا قۇجاتتار قابىلداۋ باستالدى، دەپ حابارلايدى ق ر مادەنيەت جانە اقپارات مينيسترلىگى.
كونكۋرسقا 35 جاسقا دەيىنگى، مادەنيەت، عىلىم، مەديا جانە سپورتتا جەتىستىكتەرى بار قازاقستاندىقتار قاتىسا الادى.
ولار - حالىقارالىق جانە رەسپۋبليكالىق كونكۋرستاردىڭ، فەستيۆالدار مەن ءتۇرلى شارالاردىڭ لاۋرەاتتارى، رەسپۋبليكالىق جانە حالىقارالىق دەڭگەيدەگى سپورتتىق جارىستاردىڭ جۇلدەگەرلەرى مەن جەڭىمپازدارى، سونداي-اق اتالعان سالالار مەن تۇتاستاي قوعامدى دامىتۋعا ىقپال ەتكەن ۇمىتكەرلەر.
«دارىن» مەملەكەتتىك جاستار سىيلىعى عىلىم، شىعارماشىلىق، قوعامدىق قىزمەت سالالارىندا جەمىستى ەڭبەگىمەن كوزگە تۇسكەن، سونداي-اق جوعارى سپورتتىق جەتىستىكتەرى ءۇشىن دارىندى جاستاردى مەملەكەت تاراپىنان قولداۋ ماقساتىندا ۇسىنىلادى.
بايقاۋ 10 نوميناتسيا بويىنشا وتەدى:
«ادەبيەت»،
«عىلىم»،
«ديزاين جانە بەينەلەۋ ونەرى»،
«جۋرناليستيكا»،
«كلاسسيكالىق مۋزىكا»،
«كرەاتيۆتى باستامالار»،
«سپورت»،
«تەاتر جانە كينو»،
«ەسترادا»،
«حالىق شىعارماشىلىعى».
«دارىن» جاستار سىيلىعىنا ۇمىتكەرلەردى مەملەكەتتىك ورگاندار، قوعامدىق بىرلەستىكتەر ۇسىنادى.
جەڭىمپازدارعا «دارىن مەملەكەتتىك جاستار سىيلىعىنىڭ لاۋرەاتى» اتاعى بەرىلەدى جانە ولار ديپلوممەن، توسبەلگىلەرمەن سونداي- اق قارجىلاي سىيلىقپەن ماراپاتتالادى.
جىل سايىن سىيلىقتى تابىستاۋ قازاقستان رەسپۋبليكاسىنىڭ تاۋەلسىزدىك كۇنىن مەرەكەلەۋ اياسىندا وتكىزىلەدى.
«دارىن» جاستار سىيلىعى 1992 -جىلى دارىندى جاستاردى عىلىمي، شىعارماشىلىق، قوعامدىق قىزمەت، سونداي-اق جوعارى سپورتتىق جەتىستىكتەرى ءۇشىن مەملەكەتتىك قولداۋ ماقساتىندا تاعايىندالعان. سودان بەرى اتالعان سىيلىقتى ءتۇرلى سالاداعى 340-تان استام ازامات يەلەندى.
كونكۋرسقا قاتىسۋعا قۇجاتتار 2024 -جىلعى 17-قاراشاعا دەيىن قازاقستان رەسپۋبليكاسى مادەنيەت جانە اقپارات مينيسترلىگىنىڭ جاستار جانە وتباسى ىستەرى كوميتەتى (قاعاز نۇسقادا) مىنا مەكەنجاي بويىنشا: استانا قالاسى، مانگىلىك ەل داڭعىلى 10، «مينيسترلىكتەر ءۇيى» عيماراتىندا (14-كىرەبەرىس) قابىلدايدى. ال ەلەكتروندىق نۇسقانى premiya.daryn@mki.gov.kz پوشتاسىنا جولداۋعا بولادى.
بايلانىس نومەرلەرى: 7172740525, 7172741843, 87011704654.
