دارعا اسىلعان ادام قايتا ءتىرىلدى

استانا. قازاقپارات - 2013-جىلى يران ەلىندە ءبىر كيلوگرامم ەسىرتكىمەن ۇستالعان، ەكى بالانىڭ اكەسى ءالي رىزاعا ءولىم جازاسى بەرىلىپ، وعان سوت وتىرىسى «دارعا اسۋ» تۋرالى شەشىم شىعارعان.

سوت ۇكىمى بودجنۋرد قالاسىندا جۇزەگە اسىپ، ونى دارعا اسقان. ۇكىم ورىندالعان ساتتەن 12 مينۋت وتكەن سوڭ تۇرمە قىزمەتكەرلەرى ءالي رىزانى ءولدى دەپ مورگقا اپارىپ تاستايدى. الايدا، ەرتەسى كۇنى مورگ قىزمەتكەرلەرى الگى ادامنىڭ بويىنان جانى شىقپاعانىن كورىپ تاڭعالىستى.

بۇل حاباردى تۇرمە بيلىگى توسىرقاي قارسى السا، تۋىستارى شاتتىققا بولەندى. ءبىراق ولاردىڭ قۋانىشى كوپكە سوزىلمادى. ويتكەنى، جەرگىلىكتى سوت ورگاندارى ونىڭ قايتادان دارعا اسىلاتىنىن ايتقان ەدى. بۇل جاعدايعا ۇلتارالىق كەشىرىم ۇيىمى دا ارلاسىپ، يران بيلىك ورگاندارى سوت ۇكىمىن قايتا تالقىلاۋعا جىبەرەدى. ناتيجەسىندە، يران ادىلەت ءمينيستىرى مۇستافا پۇرمۇحامماد «ءبىر مارتە اجال تىرناعىنان امان قالعان ادامدى ەكىنشى رەت دارعا اسۋدىڭ قاجەتى جوق» دەپ، ءالي رىزانىڭ ەكىنشى رەت دارعا اسىلمايتىندىعى تۋرالى ب ا ق وكىلدەرىنە مالىمدەمە جاساعان.