داماسكىدەگى مەشىتتە تاماققا تالاسقان ادامدار ءبىرىن-ءبىرى تاپتاپ ءولتىردى

استانا. KAZINFORM - سيريا استاناسى داماسكىدە اتاقتى ومەيادتار مەشىتىندە ادامدار ءبىرىن-ءبىرى تاپتاپ، 4 ادام مەرت بولدى. تاعى بىرنەشە تۇرعىن جارالانعان.

قۇرباندار جانە زارداپ شەككەندەر اراسىندا بالالار بار. بۇل تۋرالى قالانىڭ دەنساۋلىق ساقتاۋ مەكەمەسىنىڭ باسشىسىنا سىلتەمە جاساعان جەرگىلىكتى اقپارات قۇرالدارى حابارلادى.

ال Associated Press اگەنتتىگى مەشىتكە جينالعان ادامداردىڭ تەگىن تاراتىلعان تاماققا تالاسقانىن ايتادى. قاۋىپسىزدىك قىزمەتى مەشىتتى ۋاقىتشا جاپتى. ومەيادتار مەشىتى - الەمدەگى ەڭ ەجەلگى عيباداتحانالاردىڭ ءبىرى. ول 709-715 -جىلدارى سالىنعان.

باناا باحريە، قۇتقارۋشى:

- بۇرىنعى رەجيم قۇلاعان سوڭ ادامدار بۇل مەشىتكە كوپ كەلە باستادى. ءتىپتى باسقا ايماقتاردان كەلگەندەر بار. ءسويتىپ، ادام قاراسى مولايدى. وكىنىشكە قاراي، بىرنەشە كىسى قۇربان بولدى.

ءماريام ءال-ءالي، مەشىت جاماعاتى:

- باشار اساد حالىقتى قانشاما جىل اشتىقتا ۇستادى. ءبارى ءبىر تاباق كۇرىشتەن باستالدى. تاماقتى كورگەن ادامداردىڭ ەسى شىعىپ كەتكەن. ءبارى ءبىرىنشى بولىپ العىسى كەلەدى.

24.kz