داماسك اۋەجايى 13 جىلدا قاتاردان العاشقى رەيستى قابىلدادى
استانا. KAZINFORM - داماسك حالىقارالىق اۋەجايى سەيسەنبى كۇنى قاتاردان 13 جىلداعى العاشقى ازاماتتىق رەيستى قابىلدادى. بۇل تۋرالى اۋەجاي وكىلدەرى مالىمدەدى، دەپ جازادى شينحۋا اقپارات اگەنتتىگى.
سيريانىڭ بۇرىنعى ۇكىمەتى تۇسىنداعى شيەلەنىستەرگە بايلانىستى توقتاتىلعان باعىت جەلتوقساندا بيلىك اۋىسقاننان كەيىن بىرنەشە اپتا وتكەن سوڭ قايتا جانداندى. بۇل سيريانىڭ جاڭا ۇكىمەتى مەن دوحا اراسىنداعى قارىم- قاتىناستاردىڭ جىلىنۋىن ءبىلدىرۋى مۇمكىن.
كەيىنگى رەيستەر نەمەسە ۇزارتىلعان قىزمەت كورسەتۋ كەستەلەرى تۋرالى تولىعىراق اقپارات ءالى جاريالانعان جوق.
باشار اساد بيلىگى قۇلاتىلعاننان كەيىن سيريانىڭ وتپەلى ۇكىمەتىنىڭ جاڭا سىرتقى ىستەر ءمينيسترى اسااد حاسان اش-شيباني دوحاعا بارىپ، وندا قاتاردىڭ پرەمەر-ءمينيسترى جانە سىرتقى ىستەر ءمينيسترى شەيح مۇحاممەد بەن ابدەل راحمان بەن دجاسسيم ءال تانيمەن كەزدەستى.
ەكى جاق تا كەلىسسوزدەردى «تەرەڭ جانە جان-جاقتى» دەپ سيپاتتاپ، سيريانى قالپىنا كەلتىرۋ جانە اۋىسۋ ۇدەرىسى ءۇشىن ورتاق جول كارتاسىنىڭ ماڭىزدىلىعىن اتاپ ءوتتى.
ەسكە سالساق، سيريا وپپوزيتسياسى داماسكىنىڭ اساد رەجيمىنەن ازات ەتىلگەنىن جاريالادى. بۇل تۋرالى سيرياداعى ادام قۇقىقتارىن باقىلاۋ ورتالىعى حابارلادى.
كەيىننەن باشار اساد پرەزيدەنتتىك قىزمەتتەن باس تارتىپ، ەلدەن كەتۋ تۋرالى شەشىم قابىلداعانى بەلگىلى بولدى.
ب ۇ ۇ مالىمەتىنشە، 3 اپتادا كورشى ەلدەردەن سيرياعا 50 مىڭنان اسا ادام ورالعان.
زارينا تۋعانبايەۆا
اۆتور
