داعىستاندا ءۇش كۇن ازا تۇتۋ كۇنى بولىپ جاريالاندى

استانا. KAZINFORM - ماحاچكالا مەن دەربەنتتە سودىرلاردىڭ شابۋىلىنا بايلانىستى داعىستان اۋماعىندا ءۇش كۇن ازا تۇتۋ جاريالاندى. بۇل تۋرالى رەسپۋبليكا باسشىسى سەرگەي مەليكوۆ اكىمشىلىگىنىڭ Telegram ارناسى حابارلادى.

«24، 25 جانە 26-ماۋسىم كۇندەرى داعىستاندا ازا تۇتۋ كۇنى دەپ جاريالاندى. جارلىققا جاڭا عانا سەرگەي مەليكوۆ قول قويدى»، - دەلىنگەن حابارلامادا.

بۇكىل رەسپۋبليكا بويىنشا ازا تۇتۋ كۇندەرى مەملەكەتتىك تۋلار جارتىلاي تومەن تۇسىرىلەدى. وڭىردە ورنالاسقان مادەنيەت مەكەمەلەرى مەن تەلەراديوكومپانيالار بارلىق ويىن-ساۋىق شارالارى مەن حابارلارىن توقتاتادى.

«داعىستان رەسپۋبليكاسىنىڭ ۇكىمەتىنە قازا بولعاندار مەن زارداپ شەككەندەردىڭ وتباسىلارىنا كومەك كورسەتۋ ءۇشىن ءتيىستى شارالاردى قابىلداۋ تاپسىرىلدى»، - دەپ اتاپ ءوتتى بيلىك وكىلدەرى.

ايتا كەتەيىك، داعىستاندا بەلگىسىز بىرەۋلەر پراۆوسلاۆ شىركەۋى مەن سيناگوگاعا شابۋىل جاسادى.

مەملەكەت باسشىسى قاسىم-جومارت توقايەۆ داعىستانداعى پراۆوسلاۆيە شىركەۋى مەن سيناگوگاعا لاڭكەستىك ارەكەتتەر جاسالىپ، سونىڭ سالدارىنان ءدىن جانە قۇقىق قورعاۋ ورگاندارى قىزمەتكەرلەرىنىڭ قازا بولۋىنا بايلانىستى رەسەي پرەزيدەنتى ۆلاديمير پۋتينگە كوڭىل ايتتى.

اۆتور

زارينا تۋعانبايەۆا