داعىستاندا بەلگىسىز بىرەۋلەر پراۆوسلاۆ شىركەۋى مەن سيناگوگاعا شابۋىل جاسادى
ماحاچكالا. KAZINFORM - دەربەنت پەن ماحاچكالادا بەلگىسىز ادامدار ەكى پراۆوسلاۆيە شىركەۋىنە، سيناگوگا مەن جول پوليتسياسى بەكەتىنە شابۋىل جاسادى. ەكى سودىردىڭ كوزى جويىلدى، دەپ حابارلايدى ت ا س س.
«دەربەنت پەن ماحاچكالادا ەكى پراۆوسلاۆيە شىركەۋى، سيناگوگا مەن جول پوليتسياسى بەكەتىنە شابۋىل جاسالدى»، - دەپ جازدى تەرروريزمگە قارسى ۇلتتىق كوميتەت.
«دەربەنتتەگى ءدىني قىزمەتكەر مەن ماحاچكالادا شىركەۋ كۇزەتشىسى قازا تاپتى»، - دەپ مالىمدەدى داعىستاننىڭ قوعامدىق باقىلاۋ كوميسسياسىنىڭ ءتوراعاسى شاميل حادۋلايەۆ.
ماحاچكالادا بەلگىسىز بىرەۋلەر ەرموشكين كوشەسىندەگى جول پوليتسياسى بەكەتىنە وق جاۋدىرعان.
«الدىن الا مالىمەت بويىنشا، التى پوليتسيا قىزمەتكەرى قازا تاۋىپ، 12- ءسى جارالاندى»، - دەپ جازدى داعىستان ىشكى ىستەر مينيسترلىگىنەن.
ماحاچكالادا قاقتىعىس جالعاسۋدا، پوليتسيانىڭ پاترۋلدىك كولىگى ورتەندى.
داعىستاننىڭ دەربەنت قالاسىنداعى سيناگوگادا بەلگىسىز بىرەۋلەردىڭ شابۋىلىنان كەيىن ءورت شىقتى، دەپ حابارلادى قالا اكىمدىگى. توتەنشە جاعدايلار مينيسترلىگىنىڭ قىزمەتكەرلەرى ءورتتى ءسوندىرىپ، وقشاۋلادى.
داعىستاندا «ۇستاۋ» جوسپارى جاريالاندى. شابۋىل جاساۋشىلاردىڭ جەكە باسى انىقتالىپ جاتىر.
«ەكى سودىر جويىلدى، قاۋىپسىزدىك كۇشتەرىنىڭ جۇمىسى جالعاسۋدا»، - دەلىنگەن داعىستان ىشكى ىستەر مينيسترلىگىنىڭ مالىمدەمەسىندە.
ول دەربەنت پەن ماحاچكالاداعى شابۋىلداردى الەۋمەتتىك جاعدايدى تۇراقسىزداندىرۋ ارەكەتى دەپ اتاپ، ازاماتتاردى سابىرعا شاقىردى.
تەرگەۋ كوميتەتى تەراكت (رەسەي فەدەراتسياسى قىلمىستىق كودەكسىنىڭ 205-بابى) بويىنشا ءىس قوزعادى. دەربەنتتەگى وقيعا ورنىنا داعىستان بويىنشا تەرگەۋ كوميتەتىنىڭ وبلىستىق دەپارتامەنتىنىڭ باسشىلىعى، تەرگەۋشىلەرى مەن كريميناليستەرى اتتاندى.
داعىستاننىڭ بارلىق اۋماعىندا تەرروريزمگە قارسى وپەراتسيا رەجيمى ەنگىزىلدى.
داعىستان رەسپۋبليكاسى ءمۇفتياتىنىڭ Telegram-كانالىنداعى جاڭارتىلعان اقپاراتقا سايكەس، ماحاچكالا مەن دەربەنتتە سودىرلاردىڭ شابۋىلى سالدارىنان 9 ادام قازا تاپتى، ونىڭ جەتەۋى قۇقىق قورعاۋ ورگاندارىنىڭ قىزمەتكەرلەرى، 25 ادام جاراقات الدى.
