ءۇيىن سۋ باسقان تۇرعىنداردىڭ شىعىنى قالاي وتەلەدى - مينيستر جاۋابى

استانا. KAZINFORM - سۋ باسقان وڭىرلەردە تۇرعىن ءۇي الۋدىڭ مەحانيزمدەرى ازىرلەندى. بۇل تۋرالى ونەركاسىپ جانە قۇرىلىس ءمينيسترى قانات شارلاپايەۆ ءمالىم ەتتى.

«سۋ تاسقىنى اپاتىنان زارداپ شەككەن ازاماتتاردىڭ تۇرعىن ءۇي ماسەلەسىن جەدەل شەشۋدىڭ مەحانيزمدەرى ازىرلەندى. ناقتىراق ايتساق، اكىمدىكتەرمەن بىرلەسىپ دايىن پاتەرلەر ساتىپ الۋ، زارداپ شەككەن ازاماتتاردىڭ بەكىتىلگەن جوباعا سايكەس ءوز قالاۋىمەن باسپانا تاڭداۋى جانە اكىمدىكتەرمەن جوندەۋ جۇمىستارىن جۇرگىزۋ نەمەسە ولاردىڭ شىعىندارىن وتەۋ»، - دەدى قانات شارلاپايەۆ ۇكىمەت وتىرىسىندا.

ءمينيستردىڭ ايتۋىنشا، باسپاناسىنان ايىرىلعان ساياجاي تۇرعىندارىنا دا قولداۋ كورسەتىلەدى.

«بۇگىندە اكىمدىكتەرمەن جاڭا قۇرىلىسقا جەر ۋچاسكەلەرىن تاڭداۋ جۇمىستارى جۇرگىزىلۋدە. اقتوبە وبلىسىندا قۇرىلىس جۇمىستارى باستالدى، ال اقمولا، قاراعاندى، قوستاناي وبلىستارىندا دايىن جاڭا باسپانا كىلتتەرى تابىستالۋدا. بۇل جۇمىستار باسقادا وڭىرلەردە دە جالعاسادى»، - دەيدى ول.

اۆتور

داۋلەت ىزتىلەۋ