عىلىمي جوبالاردىڭ %70-دان استامى ماقالالار مەن كىتاپتار شىعارۋمەن اياقتالادى – انتيكور
استانا. KAZINFORM - ميللياردتاعان دوللارلىق ينۆەستيتسياعا قاراماستان، عىلىمي جوبالاردىڭ %70- دان استامى پراكتيكالىق پايدا اكەلمەي، ماقالالار مەن كىتاپتار شىعارۋمەن اياقتالادى.
بۇل تۋرالى انتيكوردا ءبىلىم جانە عىلىم سالاسىنداعى جەمقورلىق تاۋەكەلدەرىن جويۋ باعىتىندا وتكەن جيىندا ايتىلدى.
جيىندا جوبالاردى ىرىكتەۋ پروتسەسى اشىق ەمەس، ولاردىڭ ساراپتاماسى فورمالدى تۇردە جۇرگىزىلەتىنى، ناقتى ناتيجەلەر ءۇشىن جاۋاپكەرشىلىك جوق ەكەنى ايتىلدى.
سونىمەن قاتار 2016 -جىلدان باستاپ مەملەكەت عىلىمي جوبالاردى كوممەرتسيالاندىرۋعا شامامەن 32 ميلليارد تەڭگە جۇمسادى، ولاردىڭ ەداۋىر بولىگى مالىمدەلگەن ماقساتتارعا قول جەتكىزە المادى.
ناقتى عىلىمي جۇمىستىڭ ورنىنا قاراجات زەرتتەۋلەرگە بايلانىستى ەمەس شىعىندارعا كەتەدى، جوبا بيۋدجەتتەرى نەگىزسىز كوتەرىلەدى.
عىلىمي تاعىلىمدامالارعا گرانتتار بەرۋ ماسەلەلەرىندە دە ەلەۋلى جەمقورلىق تاۋەكەلدەرى انىقتالدى.
بۇعان دەيىن بيۋدجەتتى جوسپارلاۋ جانە يگەرۋ كەزەڭدەرىندە پەداگوگتەردىڭ ەڭبەگىنە اقى تولەۋ قورىنان قاراجات جىمقىرۋدىڭ جۇيەلى فاكتىلەرى اشىلعانى تۋرالى حابارلادىق.
