ءىشىپ جۇرگەن اسىمىز ساپالى ما - زەرتحانا ورتالىعىنان رەپورتاج
استانا. KAZINFORM - ەلوردادا سۋ، اۋا، توپىراق، تاماق ونىمدەرى مەن حالىق تۇتىناتىن تاۋارلارعا سانيتارلىق زەرتتەۋلەر جۇرگىزەتىن ورتالىق بار. ماقسات - حالىق تۇتىناتىن ونىمدەر مەن ازىق-تۇلىكتىڭ ساپاسىن تەكسەرىپ، ءتيىستى باعا بەرۋ.

وسى ورايدا Kazinform اگەنتتىگىنىڭ ءتىلشىسى قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعىنىڭ سانيتارلىق-ەپيدەميولوگيالىق ساراپتاما ورتالىعىنىڭ ديرەكتورى ساۋلە ءشارىپوۆا ايتىپ بەردى.

«ءبىزدىڭ ماماندار جوعارى تەحنولوگيالىق جابدىقتىڭ كومەگىمەن ادام دەنساۋلىعىنا كەرى اسەر ەتۋى مۇمكىن قاۋىپتى ەلەمەنتتەردى انىقتايدى. زەرتتەۋلەر ارقىلى قورشاعان ورتانى تۇراقتى ورگانيكالىق جانە ادام دەنساۋلىعىن لاستايتىن ۋلى ەلەمەنتتەر مەن ديوكسيندەردى تابامىز. بۇل كوبىنەسە جانۋارلاردان الىناتىن ونىمدەرمەن بايلانىستى»، - دەدى ساۋلە ءشارىپوۆا.
ورتالىق باسشىسىنىڭ ايتۋىنشا، ورتالىقتىڭ زەرتتەۋلەرى ەلەمەنتتەردىڭ ساپاسى مەن سانىنىڭ ناقتى كورسەتكىشتەرىن انىقتاۋعا باعىتتالعان. سەبەبى تاعامدا تۇز بەن قانتتىڭ ارتىق نەمەسە كەم بولۋى، سونداي-اق، ماي مولشەرىنىڭ شامادان تىس بولۋى جۇرەك-قان تامىرلارى اۋرۋلارىنىڭ، سەمىزدىك پەن قانت ديابەتى تاعى باسقا دەرتتىڭ قاۋپىن ارتتىرادى.

«سوڭعى ۋاقىتتا ءبىزدىڭ ماماندار مۇزداتىلعان تاعامدارداعى ىلعالدىلىقتىڭ جوعارىلاۋىن انىقتاپ جاتىر. بۇل دەنساۋلىققا قاۋىپتى ەمەس، ءبىراق تۇتىنۋشى ونىمدەگى اقۋىز، ماي جانە كومىرسۋدىڭ ورنىنا قۇر سۋدى ساتىپ الادى. ودان بولەك، سانيتارلىق-ەپيدەميولوگيالىق ساراپتاما ورتالىعىنىڭ ماماندارى سىنامالار ارقىلى ءونىمنىڭ قاپتامادا كورسەتىلگەن كورسەتكىشتەرگە سالىستىرمالى تالداۋ جاسايدى»، - دەپ اتاپ ءوتتى سانيتارلىق-ەپيدەميولوگيالىق ساراپتاما ورتالىعىنىڭ باسشىسى.
سونداي-اق، ورتالىق ماماندارى كەڭ اۋقىمدى زەرتتەۋ جۇرگىزۋىنىڭ ارقاسىندا حالىق دەنساۋلىعىن ساقتاۋدا ماڭىزدى ءرول اتقارىپ وتىرعانىن ايتادى.
ايتپاقشى، اتالعان ورتالىقتا وتاندىق نارىقتا پايدالى جانە دۇرىس تاۋار جاساۋعا كومەكتەسۋ ءۇشىن بيزنەس وكىلدەرىنە ارنالعان سانيتاريالىق-ەپيدەميولوگيالىق سالاۋاتتىلىقتى قامتاماسىز ەتۋ بويىنشا تۇراقتى نەگىزدە شەبەرلىك سىنىپتارى وتكىزىلەدى.
اۆتور
داۋلەت ىزتىلەۋ