ءولىم جازاسى ءومىر بويى باس بوستاندىعىنان ايىرۋمەن اۋىستىرىلعان ادام مەرزىمىنەن بۇرىن بوستاندىققا شىعا الا ما

استانا. KAZINFORM - ءولىم جازاسىنا كەسىلىپ، كەيىن ول ءومىر بويىنا باس بوستاندىعىنان ايىرۋ جازاسىنا اۋىستىرىلعان ادام شارتتى تۇردە مەرزىمىنەن بۇرىن بوستاندىققا شىعا الا ما؟ ق ر كونستيتۋتسيالىق سوتتىڭ باسپا ءسوز قىزمەتى بۇل سۇراققا جاۋاپ بەردى.

كونستيتۋتسيالىق سوتقا ازاماتتان قىلمىستىق كودەكستىڭ 72-بابى 8-بولىگى 1-تارماعىنىڭ كونستيتۋتسياعا سايكەستىگىن قاراۋ تۋرالى ءوتىنىش كەلىپ ءتۇستى.

داۋلانىپ وتىرعان نورمادا ۇكىمى ءولىم جازاسىنان ءومىر بويىنا باس بوستاندىعىنان ايىرۋعا وزگەرتىلگەن سوتتالعاندارعا شارتتى تۇردە مەرزىمىنەن بۇرىن بوساتۋ تۋرالى ءوتىنىش بەرۋ قۇقىعى قاراستىرىلماعان.

كونستيتۋتسيالىق سوتتىڭ وتىرىسىندا ءوتىنىش بەرۋشى، باس پروكۋراتۋرانىڭ، ىشكى ىستەر، ادىلەت مينيسترلىكتەرىنىڭ، ادام قۇقىقتارى جونىندەگى ۇلتتىق ورتالىقتىڭ وكىلدەرى جانە ساراپشىلار ءوز ۇستانىمدارىن ءبىلدىردى.

كونستيتۋتسيالىق سوتتىڭ قورىتىندى شەشىمى كونستيتۋتسيالىق زاڭنىڭ 65-بابىنا سايكەس ك س رەسمي سايتىندا مىنا سىلتەمە بويىنشا، «ەگەمەن قازاقستان» جانە «كازاحستانسكايا پراۆدا» گازەتتەرىندە جاريالانادى.

اۆتور

ەربول جانات