ءتورت ءتىلدى مەڭگەرگەن 11 جاسار قازاق بالاسى جاھان جۇرتىن ءتانتى ەتتى

استانا. KAZINFORM - ءتورت ءتىلدى تەڭ مەڭگەرگەن قازاق بالاسى جاھان جۇرتىن ءتانتى ەتتى. 11 جاسار بەكنۇر جانىبەكتىڭ الەمگە تانىمال بلوگەر يۋدجيگە بەرگەن سۇحباتى جەلىدە ميلليونداعان قارالىم جيناعان، دەپ حابارلايدى «جىبەك جولى» تەلەارناسى.

قول-اياعى بولماسا دا، كوپتەن وزعان جەتكىنشەك قازاق، ورىس، اعىلشىن جانە فرانسۋز تىلدەرىندە ەركىن سويلەيدى.

«يۋدجي ون تىلدە سويلەيدى. بەكنۇر دا سوعان تالپىنىپ ءجۇر. قىزىعۋشىلىقتارى بىردەي بولعان سوڭ شىعار، ەكەۋى تەز ءتىل تابىستى. بەكنۇر يۋدجيدى ۇلگى تۇتادى. جەلىدەگى بەينەجازبالارىن جىبەرمەي قارايدى. بلوگەردىڭ قازاقستانعا كەلە جاتقانىن كورىپ، كەزدەسۋگە ۇسىنىس جاسادىق. ول بىردەن كەلىستى. ەكەۋىنىڭ سۇحباتىن جەلىگە جۇكتەگەنىمىز سول ەدى، الەمنىڭ تۇكپىر-تۇكپىرىنەن جىلى لەبىزدەر كوپتەپ كەلدى»، - دەيدى بەكنۇردىڭ اناسى.

بەكنۇر ءبىلىم مەن ونەردى قاتار الىپ ءجۇر. ومىرگە قۇشتار جەتكىنشەك اعىلشىن تىلىنەن رەسپۋبليكالىق وليمپيادانىڭ جەڭىمپازى. ەۆروۆيۆجن-2021 ءان بايقاۋىنىڭ ءبىرىنشى ورىن يەگەرى.

«التى جاسىمنان ءان ايتا باستادىم. ەۆروۆيدەنيەگە اكەم اپاردى. مۇمكىن ەمەس نارسە جوق! قول-اياق جوق بولسا دا، ءبارى مۇمكىن! ماقساتقا جەتۋگە بولادى»، - دەيدى بەكنۇر جانىبەك ۇلى.

دارىندى جەتكىنشەك قازاق تىلىندە وسىدان ءبىر جىل بۇرىن سويلەي باستاعان. وعان دەيىن وتباسىمەن ۇزاق ۋاقىت اۋەلى امەريكادا، سوسىن فرانسيادا تۇرعان. ءبىراق بەكنۇر تۋعان جەرىن قاتتى ساعىناتىن.

«ونىڭ ۇستىنە ءۇش ءتىلدى بىلە تۇرا، انا تىلىندە سويلەمەيتىنى ونى قىنجىلتاتىن. سوندىقتان شەت ەلدە حالىق اندەرىن ءجيى ايتىپ ءجۇردى»، - دەيدى اتا-اناسى.

بەكتەمىسوۆتەر وتباسى ەلگە بىلتىر قايتا ورالعان. قازىر بەكنۇر قازاق مەكتەبىندە وقيدى.

«بەكنۇر وتە العىر. بىلىمگە قۇشتار. ءبىزدىڭ مەكتەپتىڭ ماقتانىشى. قاي ءپاندى بولماسىن، جاقسى وقيدى. بەكنۇر بولاشاقتا IT مامان بولعىسى كەلەدى. تالابى تاۋداي ورەن ارمانىنا ۇمتىلۋدى قازىردەن باستاپ، سيفرلىق تەحنولوگيالاردىڭ قىر-سىرىن ۇيرەنىپ ءجۇر»، - دەيدى بەكنۇردىڭ سىنىپ جەتەكشىسى ءمادينا ءانۋاروۆا.

اۆتور

ايدار وسپاناليەۆ