ءسىبىر وزەنىن ورتالىق ازيا ەلدەرىنە بۇرۋ جوباسىنا قايتا ورالۋ ۇسىنىلدى

استانا. KAZINFORM - باحروم يسمايلوۆ ءسىبىر وزەنى سۋىنىڭ ءبىر بولىگىن ورتالىق ازيا ەلدەرىنە جىبەرۋدى كوزدەيتىن «ءسىبىر- ورتالىق ازيا» جوباسىن قايتا ىسكە قوسۋدى ۇسىندى.

«ماسكەۋ قالاسىنىڭ وزبەك ۇلتتىق- مادەني اۆتونومياسى» ۇيىمىنىڭ جەتەكشىسى باحروم يسمايلوۆ YouTube جەلىسىندەگى ارناسىندا «ءسىبىر - ورتالىق ازيا» جوباسىن قايتا باستاۋ ۇسىنىلاتىن ۆيدەو جاريالادى.

ونىڭ ايتۋىنشا، ورتالىق ازياداعى سۋ تاپشىلىعى مەملەكەتتىك دەڭگەيدە، اسىرەسە وزبەكستان مەن تاجىكستاندا سەزىلۋدە. رەسەيدە مۇزدىقتاردىڭ ەرۋىنە بايلانىستى سۋدىڭ شامادان تىس مولشەرى سۋ تاسقىنىنىڭ كوبەيۋىنە اكەلەدى.

«رەسەيدە كوپتەگەن ءىرى وزەندەر بار ەكەنى بەلگىلى، ال ازيادا قاي كەزدە دە سۋ ماسەلەسى بولعان. سول سەبەپتى كەڭەس وداعىندا وب وزەنىنىڭ ءبىر بولىگىن قازاقستان جاعىنا بۇرىپ، ك س ر و سۋ شارۋاشىلىعى مينيسترلىگى تاراپىنان كانال قۇرۋ ۇسىنىلدى. كەيىنىرەك ەنى - 300 مەتر، تەرەڭدىگى - 15 مەتر، ۇزىندىعى 2500 شاقىرىمنان اساتىن كانال قۇرۋ جوسپارلاندى»، - دەدى ول.

«ءسىبىر- ورتا ازيا» ارناسى رەسەي مەن ورتالىق ازيانىڭ شولەيتتى ايماقتارىن سۋمەن قامتاماسىز ەتۋ، كەمەلەر قوزعالىسىن باستاۋ، وزبەكستان مەن قازاقستاننىڭ فلوراسى مەن فاۋناسىن وزگەرتۋ، ەڭ باستىسى - ارال تەڭىزىن قۇتقارۋ سياقتى ءبىرقاتار مۇمكىندىكتەرگە جول اشاتىن ەدى.

باحروم يسمايلوۆتىڭ ايتۋىنشا، بۇل جوبامەن ەڭ ۇزدىك كەڭەستىك جانە 160 عىلىمي-ەكونوميكالىق ينستيتۋتتاردىڭ عالىمدارى جۇمىس ىستەگەن.

1986 -جىلى «ەرتىس-قاراعاندى» كانالىنىڭ ءبىر بولىگى قۇرىلىسىنىڭ ءبىرىنشى كەزەگى اياقتالعاننان كەيىن ك س ر و باسشىلىعى ءبىرقاتار سەبەپتەرگە بايلانىستى قۇرىلىس جۇمىستارىن توقتاتتى.

ماسكەۋدەگى وزبەك دياسپوراسىنىڭ جەتەكشىسى كانال قۇرىلىسىن قايتا باستاۋعا مۇمكىندىك بار دەپ ەسەپتەيدى.

«الەمدىك تاجىريبە مۇنىڭ مۇمكىن ەكەنىن كورسەتىپ وتىر جانە بۇگىندە بىزدە مۇنداي جوبانى جۇزەگە اسىرۋ پروتسەسىن اۆتوماتتاندىرۋ جانە جەڭىلدەتۋ ءۇشىن بارلىق تەحنولوگيالىق مۇمكىندىكتەر بار»، - دەدى ول.

كانال جوباسى رەسەيدىڭ لوگيستيكالىق مۇمكىندىكتەرىن ايتارلىقتاي جاقسارتادى، ياعني، ونىمدەردى ورتالىق رەسەيدەن پارسى شىعاناعى ەلدەرىنە جەتكىزىپ، رەسەي ەكونوميكاسىن نىعايتادى. ءوز كەزەگىندە كانال اتالعان ەلدەردىڭ ونىمدەرىن رەسەيگە يمپورتتاۋعا مۇمكىندىك بەرەدى. جوبا بۇكىل ورتالىق ازيانى اۋىل شارۋاشىلىعىن، قۇرىلىستى جانە ءوسىپ كەلە جاتقان حالىقتى قاجەتتى سۋمەن قامتاماسىز ەتەدى.

«مۇمكىن، رەسەيدەن وزبەكستانعا كەمەمەن بارۋ مۇمكىندىگى بۇيىرار؟» - دەيدى باحروم يسمايلوۆ.

اۆتور

بەگابات ۇزاقوۆ