ءسۇت ونىمدەرىنىڭ يمپورتى نە سەبەپتى ارتتى

استانا. KAZINFORM - كەيىنگى ءبىر جىلدا ءسۇت ونىمدەرىنىڭ يمپورتى ارتتى. بۇل تۋرالى پارلامەنت ماجىلىسىندە مال شارۋاشىلىعى ونىمدەرىن تەرەڭ وڭدەۋ تاقىرىبىنا ارنالعان ۇكىمەت ساعاتىندا اۋىل شارۋاشىلىعى ءمينيسترى ايداربەك ساپاروۆ ايتتى.

«يمپورتتىڭ نەگىزگى ۇلەسىن كىلەگەي، ماي، قۇرعاق ءسۇت، ىرىمشىك جانە سۇزبە الادى. تەك سوڭعى جىلدىڭ وزىندە ءسۇت ونىمدەرىنىڭ يمپورتى شيكى سۇتكە قايتا ەسەپتەگەندە 2022 -جىلعى 580 مىڭ توننادان 2023 -جىلى 800 مىڭ تونناعا دەيىن ءوستى. ارزان يمپورتتىڭ قىسىمىنان باسقا، ءبىز ءوز دايىن ونىمدەرىمىزدىڭ جوعارى وزىندىك قۇنىن بايقاپ وتىرمىز. ماسەلەن، سارى مايدى الايىق. قازاقستاندا وندىرىلگەن مايدىڭ وزىندىك قۇنى - كەلىسىنە 3100 تەڭگە. ال يمپورتتىڭ ورتاشا باعاسى – كەلىسىنە 1800-2300 تەڭگە»، - دەدى ا. ساپاروۆ.

ونىڭ پايىمىنشا، بۇل تۇرعىدا تەحنيكالىق رەگلامەنتتەر جانە تۇتىنۋشىلاردىڭ ءونىمنىڭ قۇرامى مەن ساپاسى تۋرالى حابارسىز بولۋى اسەر ەتىپ وتىر. سالدارىنان مۇنداي باسەكەلەستىك ىشكى وندىرىسكە كەرى اسەرىن تيگىزەدى.

«ساپاسى تومەن ونىمدەر ماسەلەسىن شەشۋ ءۇشىن جاۋاپتى مەملەكەتتىك ورگانداردىڭ قولداۋى كەرەك. ياعني حالىق اراسىندا ەلىمىزدە وندىرىلەتىن ساپالى ءونىم جايىندا كەڭىنەن مالىمەت بەرۋ كەرەك. بۇل ماسەلەدە مادەنيەت جانە اقپارات مينيسترلىگى مەن دەنساۋلىق ساقتاۋ مينيسترلىگىنىڭ قولداۋى قاجەت»، - دەدى مينيستر.

مينيستر ءبىراز جىلدار بويى مال شارۋاشىلىعىندا دا، وسىمدىك شارۋاشىلىعىندا دا ستاتيستيكالىق دەرەكتەر بۇرمالانىپ كەلگەنىن ايتتى.

اۆتور

رۋسلان عابباسوۆ