ءۇندىستاندىقتار كىتاپتى ەڭ كوپ وقيتىن مەملەكەت دەپ تانىلدى

استانا. قازاقپارات - رەسەي تۇرعىندارى كىتاپ وقۋعا اپتاسىنا 7 ساعات ارنايدى. كورشى ەل بىلتىر بۇل كورسەتكىش بويىنشا ۇزدىك وندىققا كىرگەن. ال كىتاپ ەڭ كوپ وقيتىن ەلدەردىڭ ۇشتىگىنە ازياداعى 3 مەملەكەت ەندى. ول: ءۇندىستان، تايلاند پەن قىتاي.

ءۇندىستان حالقى كىتاپتى كوپ وقيتىن ەل سانالادى. مۇنى NOP World كومپانياسى ماماندارىنىڭ بىلتىر جۇگىزگەن زەرتتەۋ ناتيجەلەرى كورسەتىپ وتىر. وعان سايكەس ءۇندىستان تۇرعىندارى ەڭ كوپ وقيتىن مەملەكەت دەپ تانىلدى. مۇندا ءار تۇرعىن كىتاپ وقۋعا اپتاسىنا ورتا ەسەپپەن 10 ساعات 42 مينۋت ارنايدى ەكەن. ەكىنشى ورىندا تايلاند، ءۇشىنشى ورىندا قىتاي تۇر.

پاندەميانىڭ پايداسى الەمدە كىتاپتى ەڭ كوپ وقيتىن مەملەكەتتەردىڭ وندىعىندا ەۋروپا مەملەكەتتەرى كوپ. يسپانيا وتكەن جىلى بۇل تىزىمگە كىرمەي قالدى. ءبىراق پيرەنەي تۇبەگى بيلىگى الداعى ۋاقىتتا جاعدايدى تۇبەگەيلى وزگەرتۋدى ماقسات ەتىپ وتىر. كەيىنگى جىلدارى مۇندا كىتاپ وقيتىن تۇرعىنداردىڭ ۇلەسى %43- كە ارتقان. ماماندار: «بۇل - كوروناۆيرۋستىڭ پايداسى»، - دەيدى. ويتكەنى پاندەميا كەزىندە ۇيدەن شىقپاي وتىرعان يسپاندىقتار مەيلىنشە كوپ وقيتىن بولعان.

كىتاپ وقۋعا قىزىعۋشىلىق تومەندەدى دەگەنمەن ماماندار كەيىنگى جىلدارى دۇنيەجۇزىندە كىتاپ وقۋعا دەگەن قىزىعۋشىلىق ازايىپ بارا جاتقانىن ايتادى. ويتكەنى تەحنولوگيالار دامىعان زاماندا كوبى كوركەم شىعارمالاردان گورى الەۋمەتتىك جەلىلەردەن جاڭالىقتاردى باقىلاپ وتىرعاندى ءجون سانايدى ەكەن. مىسالى، ساۋالناما ناتيجەلەرى كورسەتىپ وتىرعانداي، كورشى رەسەي تۇرعىندارىنىڭ %30- ءى ءبىر جىل ىشىندە قولىنا بىردە ءبىر كىتاپ ۇستاماعانىن مويىنداعان. ءبىراق سونىڭ وزىندە بىلتىر كورشى ەل حالقى ەڭ كوپ وقيتىن مەملەكەتتەردىڭ ۇزدىك وندىعىنا كىردى. تۇرعىندار بۇعان اپتاسىنا ورتا ەسەپپەن 7 ساعات ارنايدى ەكەن.

اۆتورى: جۇلدىز اتاگەلديەۆا.

24.kz