ءۇش امىرلىكتە تەڭىز سۋى لايلاندى

 اراب جەرىندەگى تۋريستىك ماۋسىمنان تاعى ءسان كەتتى. بۇل جولى تەڭىز سۋى لاستاندى. امىرلىك جاعالاۋىنا جاقىن اۋماقتا شيكىزات تاسىعان كەمەگە سنارياد ءتيىپ، ءبىر ءبۇيىرىن تەسىپ وتكەن. ارتىنشا مىڭداعان توننا مۇناي اشىق تەڭىزگە توگىلدى. عارىشتان تۇسىرىلگەن سۋرەتتەر 160 شارشى شاقىرىم اۋماقتىڭ بۇلىنگەنىن راستادى. بۇل - بىرەر كۇن بۇرىنعى مالىمەت. سودان بەرى زارار مولشەرى ۇلعايۋى ابدەن مۇمكىن. ال قارا التىن تاسىعان تانكەردىڭ قاي ەلدىكى ەكەنى بەلگىسىز.

 امىرلىك ساراپشىلارى: «شابۋىلعا يران يسلام ساقشىلار كورپۋسى جاۋاپتى» دەيدى. رەسمي تەگەران بۇعان قاتىستى ازىرگە تۇسىنىكتەمە بەرگەن جوق.

حابيب ءال-مۋللا زاڭگەر، حالىقارالىق قۇقىق سالاسى بويىنشا مامان:

- ەگەر شابۋىلعا يراننىڭ قاتىسى بار بولىپ شىقسا، حالىقارالىق قۇقىق تالاپتارى بويىنشا پارسى مەملەكەتى بەلگىلى ءبىر دەڭگەيدە جاۋاپكەرشىلىكتى سەزىنۋگە ءتيىس. ءتىپتى بۇل ءىستى يرانعا باعىنىشتى قارۋلى توپتار جاساسا دا تىكەلەي تەگەرانعا شۇيلىگۋگە قۇقىلىمىز. امىرلىكتەر بولىپ جاعالاۋعا كەلگەن زالال ءۇشىن وتەماقى تالاپ ەتۋگە بولادى. ونىڭ ىشىندە شىعىنداردى تۇگەل ەسەپتەۋ كەرەك. زارار وشاعىن وقشاۋلاۋ، تەڭىزدى تازارتۋ، ەكولوگيالىق ورتانى قالپىنا كەلتىرۋ جانە باسقا دا جۇمىستار ءبىزدىڭ ەسەپتەن اتقارىلىپ جاتىر.

ءبىرقاتار امىرلىكتە سۋعا شومىلۋعا رۇقسات جوق. بار تاپقان-تايانعانىن الىپ، تىنىعۋعا كەلگەندەر جاعاجايعا جاقىنداي الماي ءجۇر. سول سەبەپتى قوناقۇيلەردە ساپىرىلىسىپ، قۇر بوسقا جۇرگەن جۇرت كوپ. تەڭىزگە تۇسۋگە كوبىنىڭ جۇرەگى داۋالامايدى. ال جاۋاپتى ورگاندار ارنايى قۇرال-جابدىقپەن جاعالاۋدى تازارتۋدى باستاپ كەتتى. قوسىمشا مالىمەتتى الداعى كۇندەرى جاريا ەتپەك. بەلگىلىسى ورمۋز بۇعازىندا قاۋىپ قايتا كۇشەيدى. كەيىنگى ايدا تەڭىز ميناسىنا تاپ بولعاندار بار. جاۋلاسقان تاراپتاردى حالىقارالىق كەمە قاتىناسىنىڭ تەجەلۋى ەش الاڭداتپايتىن ءتارىزدى. وسىنىڭ اسەرىنەن تۇتاس وڭىردە ساۋدا-ساتتىق باياۋلاپ، قاراپايىم جۇرتتى ينفلياتسيا قيناي باستادى. تاسىمال شىعىنى مەن ازىق-تۇلىك بىلتىرعا قاراعاندا ەداۋىر قىمبات.

 24.kz