ءۇش ادامنىڭ ءومىرىن قيعان الماتىداعى اپات: اۆتوبۋس جۇرگىزۋشىسىن ۇرعان جولاۋشى ەكى ايعا قامالدى

الماتىدا اۆتوبۋس جۇرگىزۋشىسىن ۇرعان جولاۋشىعا قاتىستى سوت ۇكىمى شىقتى، دەپ حابارلايدى Kazinform.

الماتى قالاسى مامانداندىرىلعان اۋدانارالىق تەرگەۋ سوتىنىڭ مالىمەتىنشە، 24-جەلتوقسانداعى سوت قاۋلىسىمەن سوتقا دەيىنگى تەرگەپ-تەكسەرۋ ورگانىنىڭ ءوتىنىشحاتى قاناعاتتاندىرىلىپ، كۇدىكتى ا-عا قاتىستى 2 اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسى قولدانىلدى.

ەسكە سالايىق، الماتىدا اۆتوبۋس ءبىر توپ ادامدى قاققان ەدى. پوليتسيانىڭ مالىمەتىنشە، №47-باعىتتاعى قوعامدىق كولىكتىڭ ىشىندەگى جولاۋشى جانجال شىعارىپ، جۇرگىزۋشى ايەلدى ۇرعان. سالدارىنان ول ەسىنەن تانىپ، كولىكتى باسقارا الماي قالعان.

اپات سالدارىنان 7 ادام زارداپ شەكتى. جەدەل مەديتسينالىق قىزمەت كەلگەنشە ۇشەۋى قايتىس بولدى.

سونداي-اق، الماتىدا اۆتوبۋس جۇرگىزۋشىسىن ۇرعان جولاۋشىعا قاتىستى قىلمىستىق ءىس قوزعالعانىن حابارلاعانبىز.