ءدىني تەرىس اعىمدارعا زاڭمەن قاتاڭ تىيىم سالۋ كەرەك - دەپۋتات
بۇگىن ءماجىلىستىڭ جالپى وتىرىسىندا دەپۋتات قازىبەك يسا ءدىني تەرىس اعىمداردىڭ بارىنە زاڭمەن توسقاۋىل قويۋ ماسەلەسىن كوتەردى، دەپ حابارلايدى قازاقپارات ءتىلشىسى.
«قۇرمەتتى ارىپتەستەر، ءدىني راديكاليزمگە زاڭمەن قاتاڭ تىيىم سالاتىن كەز جەتتى. ويتكەنى ولار ۇلتتى جويۋ كۇرەسىن قاتتى قارقىنمەن جالعاستىرىپ كەلەدى. «اق جول» پارتياسى پارلامەنتتە تالاي جىلدان بەرى ءدىني تەرىس اعىمدارعا توسقاۋىل قوياتىن زاڭ قابىلداۋدى ۇسىنىپ كەلەدى. 2011 -جىلى بۇل ماسەلەنى بيلىك تە قولعا الىپ، بارلىق مينيسترلىك پەن باس پروكۋراتۋرا جانە جوعارى سوت تا قولداعان ەدى. تەك ۇلتتىق قاۋىپسىزدىك كوميتەتى قارسى شىعىپ، وسى تىيىم سالۋ بابى زاڭعا ەنبەي قالدى»، - دەدى قازىبەك يسا ۇكىمەتكە جانە ۇلتتىق قاۋىپسىزدىك كوميتەتىنە جولداعان ساۋالىندا.
ونىڭ پايىمىنشا، قازىرگى شەت ەلگە بارىپ، كۇماندى وقۋلاردا بىرنەشە اي وقىپ كەلگەن تەرىس اعىمدى ۇستانعان «ۇستازدار» ءتۇرلى ناسيحات ايتىپ ءجۇر.
«قازىر ءان الەمىندە، ايتىستا، سپورتتا دا تايراڭداپ جۇرگەن جات اعىمنىڭ وكىلدەرى ءدىندى جامىلىپ الىپ، ارىپتەستەرى مەن انسۇيەر قاۋىمدى ءوز «سالتتارىنا» كىرگىزىپ جاتىر. ولاردىڭ بۇل ارەكەتتەرىنە تىيىم سالۋىمىز كەرەك. ءدىني تەرىس اعىمداعىلار ەلدى ەكىگە ءبولىپ، مىلتىقسىز- اق مىڭداعان جاستارىمىزدى قازاقتىڭ قاتارىنان شىعارىپ قانا قويماي، ۇلتتى جويۋ ءۇشىن ەلگە قارسى قاۋىپتى كۇشتەرگە اينالدىرىپ جاتىر. دىنگە، تىلگە، جەرگە قارسى تۇرعان تەرىس اعىمداردىڭ بارىنە زاڭمەن توسقاۋىل قويىلۋى ءتيىس. ۇلتتىق مۇددەمىز بەن داستۇرىمىزگە، ەل بىرلىگىنە بالتا شاۋىپ، مەملەكەتكە تاعى دا قاتەر ءتوندىرىپ جاتقان ءدىني تەرىس اعىمدارعا زاڭمەن قاتاڭ تىيىم سالۋ قاجەت»، - دەدى دەپۋتات.
بۇدان بۇرىن حابارلانعانداي، بيىل قىركۇيەك ايىندا ءماجىلىس ءتوراعاسى ەرلان قوشانوۆ «دومبىرا- حارام» دەگەندەرگە جاۋاپ بەرگەن ەدى.
«مەنىڭ ويىمشا، «دومبىرا- حارام» دەپ جۇرگەندەر عاسىرلار بويى قولىنان دومبىراسىن تاستاماعان بابالارىمىزدى «كۇناحار» قىلعانى عوي؟! سوندىقتان حالىقتى اداستىرۋعا جول بەرمەۋىمىز كەرەك. دەپۋتات وتە ورىندى ساۋال جولداپ وتىر» ، - دەدى ە. قوشانوۆ.
اۆتور
رۋسلان عابباسوۆ
