ءداستۇرلى انشىلەر بايقاۋىنىڭ جەڭىمپازى انىقتالدى
كوكشەتاۋدا اقان سەرى قورامسا ۇلىنىڭ 180 جىلدىعىنا جانە ءيمانجۇسىپ قۇتپان ۇلىنىڭ 160 جىلدىعىنا ارنالعان «ارقانىڭ ءان دارياسى» رەسپۋبليكالىق ءداستۇرلى انشىلەر بايقاۋى ءوتتى، دەپ حابارلايدى قازاقپارات ءتىلشىسى.
بايقاۋ كەربەز كوكشە توپىراعىندا دۇنيەگە كەلىپ، ونەر ءورىسىنىڭ قازاق دالاسىندا وركەن جايۋىنا ولشەۋسىز ۇلەس قوسقان تۇعىرى بيىك، رۋحى ءورشىل ارقا ءوڭىرىنىڭ اقيىق دۇلدۇلدەرى - اقان سەرى قورامسا ۇلى مەن ءيمانجۇسىپ قۇتپان ۇلىنىڭ شىعارمالارىن حالىققا كەڭىنەن ناسيحاتتاۋ ماقساتىندا ۇيىمداستىرىلدى. وعان ەلىمىزدىڭ ءار وڭىرىنەن 12 ءانشى قاتىسىپ، باق سىنادى.
بايقاۋعا ءبىرجان سال اتىنداعى مۋزىكا كوللەدجىنىڭ ديرەكتورى، «مادەنيەت سالاسىنىڭ ۇزدىگى» سايان مۇحامەديار (قازىلار القاسىنىڭ ءتوراعاسى)، ق ر ەڭبەك سىڭىرگەن ءارتىسى، ءداستۇرلى ءانشى بيسارا ماكەن قىزى، ق ر ەڭبەك سىڭىرگەن قايراتكەرى، ەرەن ەڭبەگى ءۇشىن ءتوس بەلگىسىنىڭ يەگەرى، ونەر ۋنيۆەرسيتەتىنىڭ دوتسەنتى، ءداستۇرلى ءانشى تولعانباي سەمبايەۆ، مالىك عابدۋللين مۋزەيىنىڭ ديرەكتورى، «مادەنيەت سالاسىنىڭ ۇزدىگى»، ءداستۇرلى ءانشى كەنجەباي مۇقىشيەۆ، اقمولا وبلىستىق حالىق شىعارماشىلىعى جانە مادەني دەمالىس ورتالىعى ديرەكتورىنىڭ مىندەتىن اتقارۋشى اسحات ماعاۋين قازىلىق ەتتى.
ونەرلى دودانىڭ قورىتىندىسى بويىنشا 3 -دارەجەلى ديپلوممەن جانە 300 مىڭ تەڭگە اقشالاي سەرتيفيكاتپەن اقمولالىق ءانشى ديانا التاي قىزى، قىزىلوردالىق نۇرتىلەك اقتايەۆ ماراپاتتالدى. 2 -ورى مەن 500 مىڭ تەڭگە اقشالاي سەرتيفيكات كوكشەتاۋلىق تولەگەن امانوۆقا بۇيىردى. ال الماتى وبلىسىنىڭ وكىلى ءىدىرباي بايباقتى 1 -دارەجەلى ديپلومعا جانە 800 مىڭ تەڭگە اقشالاي سەرتيفيكاتقا يە بولدى.
«ارقانىڭ ءان دارياسى» رەسپۋبليكالىق ءداستۇرلى انشىلەر بايقاۋىندا ۇزدىك ونەر كورسەتىپ، ورىنداۋشىلىق شەبەرلىگىن تانىتقانى ءۇشىن باس جۇلدە - 1 ميلليون تەڭگەنىڭ اقشالاي سەرتيفيكاتىنا جانە ۇيىمداستىرۋ القاسىنىڭ ديپلومىنا اباي وبلىسىنان كەلگەن ءانشى تاڭات مۇقىشيەۆ لايىق دەپ تانىلدى.
سونىمەن بىرگە ءبىرقاتار ءانشى ۇيىمداستىرۋ القاسىنىڭ ديپلومىمەن جانە 100 مىڭ تەڭگە اقشالاي سىيلىقپەن ماراپاتتالدى.
اۆتور
اسلان وسپانوۆ
