ءبىز سينگاپۋر سياقتى دارىندىلار مەن يننوۆاتسيا شوعىرلاناتىن سەنىمدى ورتالىققا اينالۋعا ۇمتىلامىز - توقايەۆ

استانا. KAZINFORM - مەملەكەت باسشىسى «قازاقستان جانە ورتا دەرجاۆالاردىڭ رولى: قاۋىپسىزدىكتى، تۇراقتىلىق پەن ورنىقتى دامۋدى ىلگەرىلەتۋ» اتتى تاقىرىپتا ءدارىس وقىدى، دەپ حابارلايدى اقوردانىڭ باسپا ءسوز قىزمەتى.

مەملەكەتتىك ساپار اياسىندا قاسىم-جومارت توقايەۆ 46- سينگاپۋر لەكسياسىن وقىدى. پرەزيدەنت جاھاندىق قاۋىپسىزدىكتى، تۇراقتىلىق پەن ورنىقتى دامۋدى قامتاماسىز ەتۋ ىسىندەگى ورتا دەرجاۆالاردىڭ اتقاراتىن ءرولى تۋرالى وي-پىكىرىمەن ءبولىستى.

1980-جىلداردان بەرى يۋسوف يسحاك ينستيتۋتى (ISEAS) ۇيىمداستىرىپ كەلە جاتقان سينگاپۋر لەكسيالارى - اكادەميالىق توپتار، ساياساتكەرلەر، ديپلوماتتار مەن جاس عالىمدار ءۇشىن مەملەكەتتەر باسشىلارى مەن الەمدىك دەڭگەيدەگى كورنەكتى ساياساتكەرلەردىڭ ۇستانىمدارىن تىكەلەي تىڭداۋعا مۇمكىندىك بەرەتىن الاڭ.

قاسىم-جومارت توقايەۆ شاراعا قاتىسۋشىلارعا ءىلتيپات بىلدىرە وتىرىپ، ءوزىنىڭ ءومىر جولىندا سينگاپۋردىڭ ايرىقشا ءمانى بار ەكەنىن اتاپ ءوتتى.

- مەن كوپ جىل بۇرىن وسى ەلدە جاس ديپلومات رەتىندە قىزمەت ەتتىم. وسىناۋ اسقاق رۋحتى مەملەكەتتىڭ تاماشا تابىس جولىنان جاڭىلماي كەلە جاتقانىن ءوز كوزىممەن كورۋ ءۇشىن سينگاپۋرعا تاعى دا كەلگەنىمە قۋانىشتىمىن. ەلدىڭ نەگىزىن قالاۋشى لي كۋان يۋدىڭ كورەگەن كوشباسشىلىعىمەن جۇرگىزىلگەن سينگاپۋرداعى ايگىلى ەكونوميكالىق وزگەرىستەر، شىن مانىندە، مەملەكەتتىڭ ىرگەسىن نىعايتۋدىڭ جانە ەكونوميكالىق وسىمگە قول جەتكىزۋدىڭ جارقىن ۇلگىسىنە اينالدى. سىزدەردىڭ ەلىڭىز قازاقستاندى دامۋ مەن وركەندەۋ باعىتىندا وزىندىك جول تاڭداۋعا جىگەرلەندىرەدى. راسىندا، سينگاپۋردا وتكىزگەن جىلدارىمدا تاباندىلىق پەن جاڭاشىلدىقتى ۇيرەندىم. بۇل قاسيەتتەر قازىرگىدەي قۇبىلمالى الەمدە قازاقستاننىڭ كەلەشەگى تۋرالى پايىمىمنىڭ قالىپتاسۋىنا اسەر ەتتى، - دەدى پرەزيدەنت.

مەملەكەت باسشىسى ەلىمىزدەگى قوعامدىق- ساياسي وزگەرىستەر جونىندە ايتا كەلىپ، «ادىلەتتى قازاقستان» جانە پرەمەر- مينيستر لوۋرەنس ۆونگ ۇسىنعان «العا، سينگاپۋر» باعدارلامالارىنىڭ ماقساتتارى مەن قاعيداتتارى ۇقساس ەكەنىنە نازار اۋداردى.

- قوس قۇجات تا حالىقتىڭ قامىن ءبىرىنشى ورىنعا قويادى جانە ەلدىڭ يگىلىگىن ءاربىر ازامات سەزىنۋگە ءتيىس دەگەن قاعيداتتى ۇستانادى. اۋقىمدى ۇلتتىق ترانسفورماتسيا - وڭاي ۇدەرىس ەمەس. ءبىراق قانشا قيىن بولسا دا، ءبىز بۇل ستراتەگيالىق باعىتىمىزدان اينىمايمىز. بىلتىر ەكونوميكالىق ءوسىم 5,1 پايىزعا ارتتى. ءبىز ج ءى ءو مولشەرىن 2029 -جىلعا قاراي ەكى ەسە، ياعني 450 ميلليارد دوللارعا دەيىن جەتكىزۋگە نيەتتىمىز. وسى اسقاق ماقساتقا جەتۋ ءۇشىن ءبىز ءبىلىم مەن يننوۆاتسياعا نەگىزدەلگەن زاماناۋي ەكونوميكانىڭ ىرگەسىن قالاپ، جىل سايىن 6 پايىز ءوسىمدى قامتاماسىز ەتۋگە ءتيىسپىز. ءبىز سينگاپۋر سياقتى بيزنەس، قارجى، دارىندىلار مەن يننوۆاتسيا شوعىرلاناتىن سەنىمدى ورتالىققا اينالۋعا ۇمتىلامىز، - دەدى قازاقستان پرەزيدەنتى.

قاسىم-جومارت توقايەۆ قازاقستاندا ينۆەستيتسيالىق ساياسات جانە ەكونوميكانى ءارتاراپتاندىرۋ باعىتىندا جۇرگىزىلىپ جاتقان جۇمىستار جونىندە ايتتى.

ونىڭ پىكىرىنشە، گەوگرافيالىق الشاقتىققا، جەر كولەمى مەن تاريحىنداعى ايىرماشىلىقتارعا قاراماستان، قازاقستان مەن سينگاپۋردىڭ كوپتەگەن قۇندىلىقتارى ورتاق ءارى ۇقساس سىن- قاتەرلەرمەن بەتپە- بەت كەلىپ وتىر.

- بيىل قاڭتار ايىندا گەرمانيانىڭ حالىقارالىق قاتىناستار جانە قاۋىپسىزدىك ينستيتۋتى العاش رەت قازاقستاندى الەمنىڭ ورتا دەرجاۆالارىنىڭ ساناتىنا قوستى. سينگاپۋرلىقتار وزدەرىن كىشكەنتاي ەل سانايتىنىن جاقسى بىلەمىن. الايدا، مەنىڭ ويىمشا، سينگاپۋردىڭ قارجىلىق جانە ەكونوميكالىق ىقپالى، ستراتەگيالىق تۇرعىدان اسا ماڭىزدى حالىقارالىق تەڭىز جولدارىنىڭ توعىسىندا ورنالاسۋى، 2024 -جىلعى Global Firepower ەسەبى بويىنشا 145 ەلدىڭ ىشىندە 30-ورىنعا تابان تىرەۋى بۇل مەملەكەتتىڭ ورنى الدەقايدا جوعارى ەكەنىن كورسەتەدى. بۇعان قوسا، ستراتەگيالىق وي-سانا مەن ءتيىمدى ديپلوماتيا سينگاپۋردى شىعىس پەن باتىس اراسىنداعى ماڭىزدى كوپىرگە اينالدىردى، - دەدى مەملەكەت باسشىسى.

اۆتور

ايدار وسپاناليەۆ