ءبىز بي بيلەپ، ءان ايتپايمىز: پوليتسەيلەر نەگە جۇمىستان قۋىلدى
استانا. قازاقپارات - استانادا الەۋمەتتىك جەلىدە تاراعان شۋلى ۆيدەودان كەيىن جۇمىستان بوساتىلعان تۋريستىك پوليتسيانىڭ ەكى قىزمەتكەرىنە قاتىستى ىشكى ىستەر مينيسترلىگى رەسمي تۇسىنىك بەردى. ۆەدومستۆو وكىلى بۇل شەشىمنىڭ قانداي نەگىزدە قابىلدانعانىن ءتۇسىندىردى.
جۋرناليستەر اتالعان قىزمەتكەرلەردىڭ ارەكەتى قوعامعا قانداي زيان كەلتىرگەنىن جانە بۇل جاعداي نەلىكتەن جۇمىستان شىعارۋعا نەگىز بولعانىن سۇرادى. يگور لەپەحا بۇل شەشىم قوعامدا ءتۇرلى پىكىر تۋدىرعانىن مويىنداپ، ماسەلە تارتىپتىك كوميسسيادا جان-جاقتى قارالعانىن جەتكىزدى. ءبىز بۇل ماسەلەنى تارتىپتىك كوميسسيادا قارادىق. كوميسسيا قىزمەتكەرلەردىڭ ارەكەتىنەن قىزمەتتىك ەتيكا مەن پوليتسەيلەردىڭ ءتارتىپ تالاپتارىن بۇزۋ دەرەگىن انىقتادى، - دەدى ۆيتسە-مينيستر.
ونىڭ ايتۋىنشا، قىزمەتتىك مىندەتىن اتقارىپ جۇرگەن جانە فورما كيگەن ءتارتىپ ساقشىلارى مۇنداي مىنەز-قۇلىققا جول بەرمەۋى ءتيىس. قىزمەتتىك مىندەتىن اتقارىپ جۇرگەن جانە فورما كيگەن پوليتسيا قىزمەتكەرلەرىن بلوگەرلەردىڭ قولدارىنا كوتەرىپ جۇرۋىنە جول بەرۋگە بولمايدى. مۇمكىن، ءبىز ءداستۇرلى كوزقاراستاعى ادامدار شىعارمىز، ءبىراق ءتارتىپ ساقشىلارى بۇلاي ۇستاماۋى ءتيىس دەپ ەسەپتەيمىز. مۇمكىن، ولار وزدەرىن مادەنيەت سالاسىندا تابالار، - دەپ قوستى يگور لەپەحا.
كوميسسيا شەشىمىمەن اتالعان قىزمەتكەرلەر ىشكى ىستەر ورگاندارىنان بوساتىلدى. ونىڭ سوزىنشە، ويىن-ساۋىق كونتەنتىنە قاتىسۋ پوليتسيانىڭ تىكەلەي فۋنكسيالارىنا كىرمەيدى. ەگەر ءبىز بيلەپ، ءان ايتاتىن بولساق، مۇنى پوليتسيانىڭ باستى فۋنكسياسى دەپ اتاۋ ەكىتالاي. مۇمكىن، بۇل جەكەلەگەن جاعدايلاردا جانە جۇمىس ۋاقىتىنان تىس ۋاقىتتا رۇقسات ەتىلەر، - دەپ تۇيىندەدى ءى ءى م باسشىسىنىڭ ورىنباسارى.
ەسكە سالايىق، بۇعان دەيىن الەۋمەتتىك جەلىلەردە استانا قالاسىنىڭ تۋريستىك پوليتسياسىنىڭ ەكى قىزمەتكەرى مەن شەتەلدىك بلوگەردىڭ قاتىسۋىمەن تۇسىرىلگەن ۆيدەو تاراعان بولاتىن. كادرلاردان ەر ادامنىڭ قىزداردى كوتەرىپ جۇرگەنى كورىنگەن ەدى. وسى وقيعادان كەيىن قىزمەتكەرلەر تارتىپتىك كوميسسيا شەشىمىمەن جۇمىستان بوساتىلدى.
