ءبىر ولشەم ۇلكەن الۋ - بالاعا اياق كيىمدى قالاي تاڭداعان دۇرىس

وسى جانە وزگە دە سۇراقتارعا جوعارى ساناتتى بالالار تراۆماتولوگ-ورتوپەدى جومارت سۇلەيمەنوۆ Kazinform تىلشىسىنە جاۋاپ بەردى.

بالانىڭ تابانى قاي جاسقا دەيىن قالىپتاسادى؟

كىشكەنتاي بالانىڭ تابانى جالپاق بولىپ كورىنسە، اتا-انالار الاڭداۋى مۇمكىن. الايدا بۇل مىندەتتى تۇردە مايتاباندىق بەلگىسى ەمەس. ويتكەنى بالانىڭ تابانى جاسىنا قاراي بىرتىندەپ وزگەرەدى. جومارت سۇلەيمەنوۆتىڭ ايتۋىنشا، بالانىڭ تابانى 1- 5 جاس ارالىعىندا داميدى. سوندىقتان بەس جاسقا دەيىن ونىڭ جالپاق بولۋى قالىپتى جاعداي سانالۋى مۇمكىن. دارىگەر مايتاباندىلىقتىڭ تۇقىم قۋالايتىن جانە جۇرە پايدا بولاتىن تۇرلەرى بار ەكەنىن دە اتاپ ءوتتى.

بالانىڭ تابانىنداعى وزگەرىستەردى باقىلاۋ ءۇشىن ورتوپەدكە ۋاقتىلى قارالعان ءجون. مامان اسىرەسە العاشقى جىلى جوسپارلى تەكسەرۋلەردەن ءوتۋدىڭ ماڭىزدى ەكەنىن ايتادى.

- ءبىر جاسقا دەيىن بالانى 1, 3, 6 جانە 9 ايلىعىندا ورتوپەدكە كورسەتۋ قاجەت. ءال بىر جاستان كەيىن جىلىنا ءبىر رەت پروفيلاكتيكالىق تەكسەرۋدەن وتكىزگەن دۇرىس، - دەدى جومارت سۇلەيمەنوۆ.

اياق كيىمدى ءبىر ولشەم ۇلكەن العان دۇرىس پا؟

بالانىڭ اياعى تەز وسەتىندىكتەن، كەي اتا-انالار اياق كيىم كوپ ۇزاماي تار بولىپ قالماسىن دەپ، ءبىر ولشەم ۇلكەنىن ساتىپ الادى. الايدا ورتوپەد مۇنداي تاڭداۋدى قۇپتامايدى. ونىڭ ايتۋىنشا، اياق كيىم بالانىڭ قازىرگى اياق ولشەمىنە ساي بولۋى كەرەك.

ولشەمنەن بولەك، اياق كيىمنىڭ تابانىنا دا نازار اۋدارۋ قاجەت.

— اياق كيىم تابانىنىڭ قالىڭدىعى كەمىندە 1 سانتيمەتر بولعانى دۇرىس. سەبەبى تابانى تىم جۇقا ءارى جۇمساق اياق كيىم بالانىڭ تابان ءپىشىنىنىڭ وزگەرۋىنە اكەلۋى مۇمكىن، — دەدى ورتوپەد.

سوندىقتان اياق كيىم ساتىپ الاردا ونىڭ سىرتقى كورىنىسىمەن شەكتەلمەي، ءپىشىنى مەن بالاعا قانشالىقتى ىڭعايلى ەكەنىن دە ەسكەرگەن ءجون.

قانداي جاعدايدا ورتوپەدكە قارالۋ قاجەت؟

بالانىڭ اياعى اۋىرسا نەمەسە جۇرگەندە تەز شارشاسا، مۇنى نازاردان تىس قالدىرماعان دۇرىس. مۇنداي شاعىمدارمەن قاتار، تابان پىشىنىندەگى وزگەرىستەر دە دارىگەرگە قارالۋعا سەبەپ بولۋى مۇمكىن.

جومارت سۇلەيمەنوۆتىڭ ايتۋىنشا، مىنا بەلگىلەردىڭ ءبىرى بايقالسا، ورتوپەدكە مىندەتتى تۇردە قارالۋ قاجەت:

· تابان ءپىشىنىنىڭ وزگەرۋى؛

· جۇرگەندە تاباننىڭ اۋىرۋى؛

· اياقتا مۇيىزگەكتىڭ پايدا بولۋى؛

· جۇرگەندە اياقتىڭ تەز شارشاۋى.

ال ەشقانداي شاعىمى جوق بالالاردى دا جىلىنا ءبىر رەت پروفيلاكتيكالىق تەكسەرۋدەن وتكىزىپ تۇرعان ءجون.

ورتوپەديالىق اياقكيىم بارلىق بالاعا قاجەت پە؟

كەي اتا-انالار بالاسىنىڭ تابانى دۇرىس قالىپتاسۋى ءۇشىن ارنايى ورتوپەديالىق اياق كيىم نەمەسە ۇلتاراق ساتىپ الادى. الايدا ولاردىڭ قاجەت نە قاجەت ەمەستىگىن دارىگەر تەكسەرۋدەن كەيىن عانا انىقتاي الادى.

— الدىمەن پلانتوگرافيا جاسالادى. بۇل تەكسەرۋ كەزىندە بالانىڭ تابان ءىزى ءتۇسىرىلىپ، ونىڭ ءپىشىنى باعالانادى. سودان كەيىن ورتوپەد ارنايى اياق كيىم نەمەسە ۇلتاراق قاجەت پە، سونى شەشەدى، — دەپ ءتۇسىندىردى جومارت سۇلەيمەنوۆ.

سوندىقتان ورتوپەديالىق اياق كيىم مەن ۇلتاراقتى ءوز بەتىنشە تاڭداماعان دۇرىس.

اياق كيىمدى قانشالىقتى ءجيى اۋىستىرۋ قاجەت؟

بالا وسكەن سايىن اياق ولشەمى دە وزگەرەدى. سوعان بايلانىستى بۇرىن ىڭعايلى بولعان اياق كيىم ۋاقىت وتە كەلە تار بولىپ قالۋى مۇمكىن. سوندىقتان اياق كيىم ساتىپ العاننان كەيىن دە ونىڭ بالاعا ساي كەلەتىنىن قاداعالاپ وتىرۋ قاجەت.

جومارت سۇلەيمەنوۆ اياق كيىمنىڭ ولشەمى مەن ىڭعايلىلىعىن ءار التى اي سايىن تەكسەرۋگە كەڭەس بەرەدى. سونداي-اق ونىڭ پىشىنىنە، تۇرىنە جانە اۋا رايىنا سايكەستىگىنە نازار اۋدارعان ءجون.

بۇعان دەيىن ورتوپەد ولجاس باينازاروۆ بالالارداعى مايتابان مەن ۆالگۋستىق دەفورماتسيانىڭ ايىرماشىلىعىن ءتۇسىندىرىپ، اياق پىشىنىندەگى وزگەرىستەردىڭ قاي كەزدە قالىپتى سانالاتىنىن ايتقان ەدى.

اۆتورلار

ۆەنەرا جولامان قىزى