ءبىر اپتادا 931 شەتەل ازاماتى ەلدەن شىعارىلدى
ىشكى ىستەر مينيسترلىگى وتكەن اپتاداعى جۇمىسىن قورىتىندىلادى، دەپ حابارلايدى قازاقپارات ءتىلشىسى.

«الدىمەن ەلدەگى كريمينوگەندىك جاعدايعا توقتالايىق. ءبىر اپتا ىشىندە 2893 قىلمىس جاسالدى، ونىڭ 1800- ءى تاۋلىك ىشىندە اشىلدى. پوليتسيا قىزمەتكەرلەرى «ءىزىن سۋىتپاي» 8 كىسى ءولتىرۋدى، 9 ولىمگە اكەپ سوققان دەنساۋلىققا قاساقانا اۋىر زيان كەلتىرۋدى، 1 قاراقشىلىق، 31 توناۋ جانە 368 بوتەن مۇلىكتى ۇرلاۋ قىلمىستارىن اشتى»، - دەدى مينيسترلىكتىڭ وكىلى شۇعىلا تۇرلىبەك باسپا ءسوز ءماسليحاتىندا.
سونداي- اق، 2-8 -قازان ارالىعىندا ەل اۋماعىندا «زاڭسىز كەلۋشى» جەدەل- پروفيلاكتيكالىق ءىس- شاراسى وتكەن.
«شارانىڭ ماقساتى - زاڭسىز كوشى- قون ارنالارىن انىقتاۋ جانە ونىڭ جولىن كەسۋ. وپەراتسيا بارىسىندا كوشى- قون زاڭناماسىن بۇزعان 8303 شەتەلدىك، سونىمەن قاتار شەتەلدىكتەردىڭ ەلدە بولۋ ەرەجەسىن دۇرىس قامتاماسىز ەتپەگەن 2632 ادام مەن شەتەلدىك جۇمىس كۇشىن تارتۋ ەرەجەلەرىن بۇزعان 537 ادام جاۋاپكەرشىلىككە تارتىلدى. ەلدەن 931 شەتەلدىك ازامات شىعارىلدى. تاۋەلسىز مەملەكەتتەر دوستاستىعى ەلدەرىنەن كەلگەن شەتەلدىكتەر اراسىنان 22 قىلمىسكەر ۇستالدى»، - دەيدى ول.
اۆتور
داۋلەت ىزتىلەۋ