«ءبارىنىڭ قولى بار، ال سەنىڭ قولىڭ قايدا؟»: الەمدىك برەندتەرمەن جۇمىس ىستەيتىن قازاقستاندىق
استانا. KAZINFORM - قوعامدا سۇلۋلىقتى بەلگىلى ءبىر ستاندارتتارمەن ولشەۋ ءالى دە باسىم. دەگەنمەن ادامنىڭ ەرەكشەلىگى ونىڭ مۇمكىندىگىن شەكتەمەي، كەرىسىنشە، جاڭا مۇمكىندىكتەرگە جول اشاتىنىن دالەلدەپ جۇرگەن جاندار بار. سولاردىڭ ءبىرى - حالىقارالىق ءسان يندۋسترياسىندا تانىلعان قازاقستاندىق كيبەرمودەل ايمان مولدابەكوۆا.
ونىڭ ءومىر جولى مەن جەتىستىكتەرى تۋرالى Kazinform ءتىلشىسى باياندادى.
«ءبارىنىڭ قولى بار، ال سەنىڭ قولىڭ قايدا؟»
Apple, Samsung, Yandex, YSL Beauty سەكىلدى الەمدىك برەندتەرمەن جۇمىس ىستەگەن ايمان مولدابەكوۆا بۇگىندە Inclusive People جوباسىن دامىتىپ، Forbes Kazakhstan باسىلىمىنىڭ «30 جاسقا دەيىنگى 30 تۇلعا» رەيتينگىنە ەنگەن. الايدا بۇل جەتىستىكتەردىڭ ارتىندا ءوزىن قابىلداۋ جولىنداعى ۇزاق ىزدەنىس جاتىر.
ايمان وڭ قولىنىڭ بىلەزىك تۇسىنان تومەنگى بولىگى جوق بولىپ دۇنيەگە كەلگەن. بالا كەزىندە مۇنىڭ سەبەبىن تۇسىنبەي، ءوزىن قاتارلاستارىمەن ءجيى سالىستىراتىن. اسىرەسە مەكتەپتە وزگەلەردەن ەرەكشەلەنەتىنىن سەزىنۋ وعان وڭاي بولماعان.
- مەكتەپتە وقىپ جۇرگەندە ءوزىمدى جايسىز سەزىنەتىنمىن. باسقا بالالاردىڭ ەكى قولى بار ەكەنىن كورىپ، وزىمە نە بولعانىن تۇسىنبەيتىنمىن. «ءبارىنىڭ قولى بار، ال سەنىڭ قولىڭ قايدا؟» دەپ وزىمە سۇراق قويدىم. ءبىراق سول ۋاقىتتا رەزەڭكەدەن جاسالعان، سىرت كوزگە ادەمى كورىنبەيتىن پروتەزىم بولدى. ونى مۇلدە شەشپەي، قىسىلاتىنمىن، - دەپ ەسكە الادى ول.
كەزدەيسوق ساپاردان باستالعان مودەلدىك مانساپ
مەكتەپتەن كەيىن ايمان الماتى ەنەرگەتيكا جانە بايلانىس ۋنيۆەرسيتەتىنە وقۋعا ءتۇسىپ، جىلۋ ەنەرگەتيكاسى ماماندىعىن تاڭدادى. الايدا ديپلوم العان سوڭ سالادا نەبارى ەكى اپتا جۇمىس ىستەپ، ماماندىعىنىڭ وزىنە جاقىن ەمەس ەكەنىن تۇسىنگەن. كەيىن كەڭسە مەنەدجەرى بولىپ ورنالاسىپ، قىزمەت بابىمەن ىستانبۇلعا ءىسساپارعا بارادى. ءدال وسى ساپار ونىڭ ومىرىنە جاڭا باعىت سىيلاعان.
- كومپانيا ىستانبۇلعا جۇمىس ىستەۋگە جىبەردى. سول جەردە ءسان يندۋسترياسىنىڭ وكىلدەرى مەنى بايقاپ قالدى، - دەدى ول.
ايماننىڭ مودەلدىك مانسابىنا 2016 -جىلى بولعان تاعى ءبىر وقيعا دا اسەر ەتتى. سول جىلى وعان 3D- پرينتەردە جاسالعان، تارتۋ كۇشىمەن جۇمىس ىستەيتىن پروتەز ورناتىلدى. وسىدان كەيىن ول فوتوسەسسيالارعا قاتىسىپ، ءسان كورسەتىلىمدەرىنە شىعا باستادى. كەيىن Mercedes-Benz Fashion Week سەكىلدى حالىقارالىق شارالاردا بوي كورسەتتى.
ۋاقىت وتە كەلە ايمان پروتەزدى ءوزىنىڭ ەرەكشەلىگىن جاسىرۋ ءۇشىن ەمەس، قاجەت بولعان جاعدايدا عانا قولدانا باستادى.
- بۇرىن اينالامداعى ادامداردىڭ پىكىرىنە قاتتى تاۋەلدى بولدىم. ىشكى سەنىمدى قالىپتاستىرۋ ءۇشىن كوپ جۇمىس ىستەدىم. قۇربىلارىم «قىسىلما، پروتەزسىز جۇرە بەر» دەپ ايتاتىن. اقىرىندا ادامداردىڭ مەن تۋرالى نە ويلايتىنىنا، قالاي قابىلدايتىنىنا ءمان بەرمەۋدى ۇيرەندىم.
پروتەزدى نەگىزىنەن ەستەتيكالىق ماقساتتا قولداندىم، ويتكەنى ونىڭ فۋنكسيونالدىق مۇمكىندىكتەرىن پايدالانبايمىن. بارلىق ءىستى سول قولىممەن جاساۋعا ابدەن ۇيرەنگەنمىن. ال بيونيكالىق پروتەزبەن ءجۇرۋ ىڭعايسىز. ونى ۇنەمى وزىڭمەن بىرگە الىپ ءجۇرۋ كەرەك، ونىڭ ۇستىنە كوبىسى اۋىر بولادى، - دەدى ول.
الەمدىك برەندتەرمەن ارىپتەستىك
ىستانبۇلداعى كەزدەيسوق تانىستىقتان كەيىن ايماننىڭ مودەلدىك مانسابى قارقىن الا باستادى. ول قازاقستانداعى العاشقى كيبەرمودەلدەردىڭ ءبىرى رەتىندە تانىلىپ، ءتۇرلى ەلدە جۇمىس ىستەدى. تانىمال فوتوگرافتاردىڭ تۇسىرىلىمىنە قاتىسىپ، رەسەيلىك «بي-2» توبىنىڭ بەينەبايانىنا ءتۇستى. سونداي-اق كومپيۋتەرلىك ويىن كەيىپكەرلەرىنىڭ بىرىنە اينالدى.
وسى كەزەڭدەگى العاشقى كاسىبي ءتۇسىرىلىمى ايماننىڭ ەسىندە ەرەكشە ساقتالعان. ول 2016 -جىلى سانكت-پەتەربۋرگتە ءوتىپ، مودەلدىك پورتفوليوسىنىڭ قالىپتاسۋىنا جول اشىپتى.
- ءار ءتۇسىرىلىمنىڭ ءوز ەرەكشەلىگى بار. دەگەنمەن ەسىمدە ەرەكشە ساقتالعانى - 2016 -جىلى سانكت- پەتەربۋرگتە وتكەن العاشقى كاسىبي فوتو ءتۇسىرىلىم. وندا كەرەمەت وبرازدار جاسالدى. تانىمال فوتوگراف ۆلاديسلاۆ كورىستامەن جۇمىس ىستەگەنىمدى ماقتان تۇتامىن. ول مەنى مودەلدىك جۇمىسقا دايىنداپ، تاماشا پورتفوليو جاسادىق.
Apple كومپانياسىمەن ارىپتەستىك ورناتۋدى ارماندايتىنمىن. بۇل ارمانىم ورىندالعاندا دا ەرەكشە اسەردە بولدىم. 2018 -جىلى ىستانبۇلدا بولعان وقيعا دا ەسىمدە. ءبىر قىز مەنى فوتوسەسسياعا شاقىردى. وعان جەتۋ ءۇشىن شامامەن ءۇش ساعات جول ءجۇردىم. ول مەنى ءۇيىنىڭ كىرەبەرىسىندە سۋرەتكە ءتۇسىرىپ، ناتيجەسىن مودەلدىك اگەنتتىككە جىبەرۋدى ۇسىندى. سوڭىندا مودەلدىك اگەنتتىك مەنى جۇمىسقا شاقىردى، - دەپ ەسكە الادى ايمان.
بۇگىندە ول Apple, YSL Beauty سەكىلدى الەمدىك برەندتەرمەن جۇمىس ىستەيدى. دەگەنمەن مودەل بارلىق ۇسىنىستى قابىلداي بەرمەيدى. وزىنە جاقىن، ونىمدەرىن كۇندەلىكتى پايدالاناتىن كومپانيالارمەن ارىپتەستىك ورناتۋعا باسىمدىق بەرەدى.
- ماعان وزىمە ۇنايتىن كومپانيالارمەن عانا جۇمىس ىستەگەن ۇنايدى. مىسالى، Apple ونىمدەرىن پايدالانامىن. سوندىقتان بۇل برەندپەن ارىپتەستىك ورناتۋ مەن ءۇشىن ەرەكشە اسەر سىيلادى. YSL Beauty كومپانياسىمەن دە سولاي. الداعى ۋاقىتتا Mercedes-Benz جانە Lego برەندتەرىمەن جۇمىس ىستەگىم كەلەدى.
دەگەنمەن سوڭعى ۋاقىتتا شەتەلدىك برەندتەردىڭ ۇسىنىستارىنان ءجيى باس تارتىپ ءجۇرمىن. قازاقستاندا كوبىرەك تانىلىپ، ەلىمىز ءۇشىن ماڭىزدى جوبالاردى جۇزەگە اسىرعىم كەلەدى، - دەدى ول.
حالىقارالىق دەڭگەيدە تاجىريبە جيناعان ايمان قازاقستانداعى مودەلدىك نارىقتىڭ مۇمكىندىگى ءالى دە شەكتەۋلى ەكەنىن ايتادى. ونىڭ سوزىنشە، ەلىمىزدە كيبەرمودەلدەرگە سۇرانىس از، ال ەڭبەكاقى دەڭگەيى جوعارى ەمەس. سوندىقتان ول مودەلدىك مانسابىمەن قاتار، باسقا دا باعىتتاردى دامىتىپ، ينكليۋزيا سالاسىنداعى جوبالارعا كوڭىل ءبولىپ كەلەدى.
ينكليۋزيانى دامىتۋ - باستى ماقسات
كيبەرمودەلدىڭ ايتۋىنشا، كەيدە مۇمكىندىگى شەكتەۋلى ادامداردىڭ جەتىستىگى ەلەۋسىز قالىپ جاتادى. مۇنى وزگەرتۋگە دەگەن نيەت كەيىپكەرىمىزدى Inclusive People جوباسىن قۇرۋعا جەتەلەگەن.
جوبا اياسىندا ايمان ەرەكشە قاجەتتىلىگى بار بالالاردى تاربيەلەپ وتىرعان انالارعا ارنالعان فوتوجوبالار ۇيىمداستىرادى. سونداي-اق برەندتەردى ينكليۋزيا تاقىرىبىنا تارتىپ، فيزيكالىق ەرەكشەلىكتەرى بار ايەلدەردىڭ ءسان يندۋسترياسىندا كورىنۋىنە مۇمكىندىك جاسايدى.
- بۇدان بولەك، پروتەزگە مۇقتاج ادامدارعا ساپالى ءارى زاماناۋي پروتەز الۋعا كومەكتەسەمىن. مەنى ادامداردىڭ ءوزى، ولاردىڭ ومىرلىك وقيعالارى، قيىندىقتاردى قالاي ەڭسەرگەنى جانە سول سىناقتاردان كەيىن قانداي تۇلعاعا اينالعانى شابىتتاندىرادى، - دەدى ايمان.
وسىلايشا، مودەلدىك مانساپ ايمان ءۇشىن تەك ءوزىن تانىتۋدىڭ جولى ەمەس، قوعامداعى ماڭىزدى ماسەلەلەردى كوتەرەتىن الاڭعا اينالدى. قازىر ول Inclusive People جوباسىمەن قاتار، Inclusive Agency باستاماسىن دا دامىتىپ، ايەلدەر مەن مۇگەدەكتىگى بار ادامداردىڭ الەۋەتىن كورسەتۋگە كۇش سالىپ ءجۇر.
كەيىپكەرىمىزدىڭ پىكىرىنشە، ينكليۋزيا ءار ادامنىڭ قوعام ومىرىنە تەڭ دارەجەدە ارالاسۋىنا مۇمكىندىك بەرۋدەن باستالادى. ول ءۇشىن ولاردىڭ شىعارماشىلىق قابىلەتىن اشۋعا جانە ءتۇرلى سالادا ءوز ورنىن تابۋىنا جاعداي جاساۋ ماڭىزدى.
بۇعان دەيىن ءسان الەمىن مويىنداتقان قازاقستاندىق جىگىتتىڭ ۇلتتىق ۇلاندا قىزمەت ەتىپ جۇرگەنىن جازعان ەدىك.
اۆتورلار
ءمولدىر سنادين
