عارىشقا ساياحات بۇل وتە قاۋىپتى ءارى قىمبات - امەريكالىق عالىم
الماتى. KAZINFORM - الماتىدا وتكەن IQ BBQ عىلىمي- مۋزىكالىق فەستيۆالىنە امەريكالىق استروفيزيك، اريزونا شتاتىندا جەر مەن عارىشتى زەرتتەۋ ۋنيۆەرسيتەتىنىڭ پروفەسسورى لوۋرەنس كراۋسس قاتىستى. ول عارىش جانە عىلىم تۋرالى بايانداما جاسادى.
ءىس-شارا بارىسىندا امەريكالىق استروفيزيك قازاقستان تۋرالى ويىن ءبىلدىردى.
- بۇل مەنىڭ قازاقستانعا ءۇشىنشى رەت، الماتىعا ەكىنشى رەت كەلۋىم. الماتىنىڭ تاۋلارى مەن ادامدارى ماعان وتە ۇنادى. جەرگىلىكتى ۋنيۆەرسيتەتتەردە بىرنەشە رەت لەكسيا وقىدىم. مۇنداعى ادامداردىڭ وقىپ-بىلۋگە دەگەن قۇلشىنىسى كۇشتى، سوندىقتان بولاشاقتا تاعى دا كەلەمىن دەپ ويلايمىن، - دەدى ول.
سونداي-اق عالىم كورەرمەندەرمەن سۇراق- جاۋاپ كەزىندە «بۇگىنگى عارىش جارىسىندا كىم جەڭىسكە جەتەدى» دەگەن ساۋالعا جاۋاپ بەردى.
- بولاشاق ءوز ويىن شەكتەمەي، تاجىريبە جاساۋعا دايىن ادامدارعا تيەسىلى جانە ولاردىڭ قاي جاقتان ەكەنى ماڭىزدى ەمەس، - دەدى امەريكالىق عالىم.
لوۋرەنس كراۋس عارىش تۋرالى عىلىمي- فانتاستيكالىق كينوفيلمدەردىڭ قايسىسى شىندىققا جاقىن ەكەنىن اتاپ ءوتتى.
- عارىشتاعى ساياحاتتىڭ شىنايى بەينەسىن كورسەتكەن فيلمدەر وتە از. مىسالى مەنىڭ دوسىم جاساعان «Interstellar» فيلمىن الىپ قاراساق، بۇل عىلىمي- فانتاستيكالىق فيلمدەردىڭ ىشىندەگى ەڭ شىندىققا جاناسپايتىنى دەۋگە بولادى. ونىڭ قاسىندا «2001: A Space Odyssey» تۋىندىسى جامان ەمەس. ءبىراق ونىڭ ءوزى عىلىمي- فانتاستيكالىق فيلمدەر بولاشاقتى ءدال بولجاي المايتىنىن كورسەتەدى. سەبەبى 1968 -جىلى تۇسىرىلگەن بۇل كينودا 2001 -جىلعا قاراي ءبارىمىز عارىشتاعى قوناق ۇيلەردە تۇرامىز دەپ بولجاعان. ءبىراق قازىر ەشكىم عارىشتا تۇرىپ جاتقان جوق. سەبەبى ادام ءۇشىن عارىشقا ۇشۋ فيلمدەردە كورسەتىلگەننەن الدە قايدا قيىن، - دەدى استروفيزيك.
سونىمەن قاتار، امەريكالىق عالىم عارىشتاعى الىس ساپارلارعا تەك روبوتتاردى جىبەرۋ مۇمكىن ەكەنىن ايتتى.
- مەنىڭشە، عارىش ىشىندە ساياحاتتاۋدىڭ شىنايى مۇمكىندىگى ادامدارعا قولجەتىمسىز. سەبەبى ءبىز عارىش ءۇش جاراتىلماعانبىز. مەن عارىش ىشىندەگى ساياحاتقا كىشكەنتاي روبوتتاردى جىبەرگەندى قۇپ كورەمىن. مىسالى، مارستا جۇرەتىن قۇرىلعىلار ماعان ول جاقتا ادام جۇرگەننەن كوبىرەك ۇنايدى. ءبىراق بۇل پىكىرمەن مەنىڭ دوسىم يلون ماسك كەلىسپەيدى. عارىشقا ساياحات بۇل وتە قاۋىپتى ءارى قىمبات، - دەدى لوۋرەنس كراۋسس.
اۆتور
دوسبول اتاجان
