ءاربىر بەسىنشى قازاقستاندىق الەۋمەتتىك كومەك الادى، ماسىلدىققا جول بەردىك - پرەزيدەنت
استانا. KAZINFORM - ازاماتتارعا الەۋمەتتىك قولداۋ كورسەتۋ جۇيەسىن قايتا قاراعان ءجون. بيۋدجەت قارجىسى شىن مانىندە كومەككە مۇقتاج ادامعا بەرىلۋى كەرەك. بۇل تۋرالى پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسىندا ايتتى.
«رەفورما جۇرگىزگەندە الەۋمەتتىك كومەكتىڭ كىمگە جانە قالاي بەرىلەتىنىن تۇگەل قايتا قاراۋ قاجەت. ياعني، بولىنگەن قارجىنى بارىنشا ءتيىمدى جۇمساپ، ونى شىن مانىندە كومەككە مۇقتاج ادامعا بەرۋ كەرەك. قازىرگى تاڭدا 4,5 ميلليونعا جۋىق ادام مەملەكەتتەن الەۋمەتتىك كومەك الادى. بۇل - شامامەن ەلىمىزدىڭ ءاربىر بەسىنشى تۇرعىنى دەگەن ءسوز. باسىم كوپشىلىگى - ەڭبەككە جارامدى ازاماتتار. حالىققا الەۋمەتتىك كومەك بەرەمىز دەپ، ءبىز، شىنى كەرەك، قوعامدا ماسىلدىق پسيحولوگياعا جول بەردىك. وركەنيەتتى ەل بولامىز دەسەك، مۇنداي جاعىمسىز ۇدەرىسكە توسقاۋىل قويۋىمىز كەرەك»، - دەدى پرەزيدەنت.
ونىڭ ايتۋىنشا، تۇراتىن ءۇيى، ءتىپتى، استىندا قىمبات كولىگى بار ازاماتتارعا ەمەس، كومەككە ءزارۋ ادامدارعا كومەك بەرىلۋى قاجەت.
«جالپى، ازاماتتارعا الەۋمەتتىك قولداۋ كورسەتۋ جۇيەسىن قايتا قاراعان ءجون. سەبەبى، مەملەكەتتەن كومەك الۋ ءۇشىن تابىسىن ادەيى ازايتىپ كورسەتەتىن ادامدار بار. الەۋمەتتىك كومەكتى كىمگە بەرۋ قاجەتتىگى ادامنىڭ كىرىسىنە ەمەس، شىعىسىنا قاراپ انىقتالۋعا ءتيىس. بۇل ماسەلەدە ءبىر ناقتى شەشىم قابىلداۋ قاجەت»، - دەدى مەملەكەت باسشىسى.
اۆتور
رۋسلان عابباسوۆ
