ءار مامان نەگىزگى كاسىبىمەن قاتار سيفرلىق داعدىلاردى جەتىك مەڭگەرۋى كەرەك - پرەزيدەنت
استانا. KAZINFORM - الەمدىك نارىقتا ج ي ماماندارىنا سۇرانىس ارتا بەرەدى جانە قازاقستاندىق ماماندار الەم قاجەتىنە جارايتىن وزىق تەحنولوگيالاردى جاساۋى كەرەك. بۇل تۋرالى پرەزيدەنت قاسىم-جومارت توقايەۆ جاساندى ينتەللەكتىنى دامىتۋ جونىندەگى كەڭەستىڭ العاشقى وتىرىسىندا ايتتى.
پرەزيدەنتتىڭ ايتۋىنشا، ۋنيۆەرسيتەتتەر جاڭا زامانعا ساي ماماندار دايىنداۋعا ءتيىس. قازاقستاننىڭ ينجەنەرلەرى، زەرتتەۋشىلەرى جانە كاسىپكەرلەرى بۇكىل الەمنىڭ قاجەتىنە جارايتىن وزىق تەحنولوگيالاردى ويلاپ تابۋعا قابىلەتتى بولۋى كەرەك.
- جىل باسىندا ەلىمىزدە AI-sana باعدارلاماسى ىسكە قوسىلدى. وسى جوبا اياسىندا 440 مىڭنان استام ستۋدەنت ج ي سالاسى بويىنشا ارنايى سەرتيفيكاتقا يە بولدى. مۇنداي باعدارلامالاردىڭ پايداسى مول. سەبەبى ءدال وسىنداي الاڭداردا ەڭ ۇزدىك جوبالار ءوز الدىنا ستارتاپ رەتىندە قالىپتاسىپ، حالىقارالىق نارىققا شىعا باستايدى، - دەپ اتاپ ءوتتى قاسىم-جومارت توقايەۆ.
الايدا پرەزيدەنت الەمدىك نارىقتا ج ي ماماندارىنا دەگەن سۇرانىستىڭ وتە جوعارى ەكەنىن ۇمىتپاۋدى ەسكە سالدى. جانە الداعى ۋاقىتتا بۇل سۇرانىس تەك وسە بەرمەك.
- مۇنداي جاعدايدا ءتىپتى ءبىلىم بەرۋ جۇيەسىنىڭ مۇمكىندىگى دە شەكتەۋلى بولاتىنى انىق. سول سەبەپتى قازىرگى وزىق تەحنولوگيا داۋىرىندە ءار مامان يەسى ءوزىنىڭ نەگىزگى كاسىبىمەن قاتار، سيفرلىق داعدىلاردى جەتىك مەڭگەرىپ، جي مۇمكىندىكتەرىن جۇمىس بارىسىندا قولدانا بىلگەنى ءجون، - دەدى مەملەكەت باسشىسى.
ايتا كەتەيىك، ەلوردادا مەملەكەت باسشىسىنىڭ توراعالىعىمەن جاساندى ينتەللەكتىنى دامىتۋ جونىندەگى كەڭەستىڭ العاشقى وتىرىسى ءوتتى.
بۇعان دەيىن پرەزيدەنت قاسىم-جومارت توقايەۆ ەلىمىزدە جاساندى ينتەللەكت سالاسىنا ماماندانعان جاڭا زەرتتەۋ ۋنيۆەرسيتەتىن قۇرۋدى تاپسىرعان ەدى.
