ءار بۇيرەكتى 120 مىڭ دوللاردان ساتىپ كەلگەن قىلمىستىق توپ ۇستالدى
پاكىستاندا اۋقاتتى كليەنتتەرگە ترانسپلانتاتسيالاۋ ءۇشىن زاڭسىز جولمەن بۇيرەك ساتقان سەگىز ادامنان تۇراتىن قىلمىستىق توپ قاماۋعا الىندى. ولاردىڭ قۇرامىندا مەديتسينا قىزمەتكەرى دە بولعان.

جەرگىلىكتى بيلىكتىڭ حابارلاۋىنشا، كەيبىر دونورلارعا كەلىسىمىنسىز وتا جاسالعان، دەپ حابارلايدى قازاقپارات BBC جاڭالىقتارىنا سىلتەمە جاساپ.
پاكىستاننىڭ پەندجاب پروۆينتسياسى ۇكىمەتىنىڭ باسشىسى موحسين ناكۆي جەكسەنبى كۇنگى باسپا ءسوز ءماسليحاتىندا دارىگەر فاۆاد مۋحتار بۇيرەكتى الۋ وپەراتسياسىن ۇيدە، ءتىپتى كوپ جاعدايدا دونوردىڭ كەلىسىمىنسىز جاساعانىن ايتتى.
دارىگەرگە وپەراتسيا كەزىندە سىبايلاسى، ماماندىعى بويىنشا اۆتومەحانيك كومەكتەسىپ وتىرعان. اۋرۋحانا ناۋقاستارى - وپەراتسيا قۇرباندارىن كوبىنەسە سول تارتىپ وتىرعان.
كەم دەگەندە 328 ادامعا وتا جاسالىپ، ونىڭ ىشىندە ءۇش دونور قايتىس بولعان.
تەرگەۋ ناتيجەسى بويىنشا، قىلمىسكەرلەر بۇيرەكتى شەتەلدىك پاتسيەنتتەرگە 10 ميلليون رۋپييگە (120 مىڭ دوللار)، ال پاكىستاندىقتارعا 3 ميلليون رۋپييگە ساتقان.
موحسين ناكۆي دارىگەردىڭ بۇعان دەيىن بەس رەت قاماۋعا الىنعانىن، ءبىراق ءار جولى جەمقورلىققا جول بەرگەن پوليتسيا قىزمەتكەرلەرىنىڭ كومەگىمەن بوساتىلىپ كەتە بەرەتىنىن ايتتى.
بۇيرەك ساۋداسىمەن اينالىساتىندار توبى نەگىزىنەن 13 ميلليون حالقى بار لاحور قالاسىندا، ەل استاناسى يسلامابادقا جاقىن تاكسيلا قالاسىندا، سونداي- اق كاشميردىڭ پاكىستاندىق بولىگىندە جۇمىس ىستەگەن.
«ءىس جۇزىندە زاڭسىز وتا مەن ترانسپلانتاتسيا جاسايتىندار بۇدان دا كوپ. بۇل - ءبىز ناقتى انىقتاعاندار عانا»، - دەدى ناكۆي.
پاكىستاندا 2010 -جىلى ادام مۇشەلەرىنىڭ ساۋداسىنا زاڭ بويىنشا تىيىم سالىنعان. دونورلاردىڭ دەنە مۇشەلەرىن شەتەلگە جاپپاي ساتۋدى توقتاتۋ ءۇشىن بيلىك 10 جىلعا دەيىن باس بوستاندىعىنان ايىرۋ جانە قوماقتى ايىپپۇل سالۋ سياقتى قاتاڭ جازالار ەنگىزدى.
ءبىراق ناتيجە جوق، حالقى كەدەي جانە قۇقىق قورعاۋ ورگاندارى جەمقورلىققا بەلشەسىنەن باتقان پاكىستاندا ورگان ساۋداسى جىل وتكەن سايىن وركەندەپ كەلەدى.
قاڭتار ايىندا پەندجاب پوليتسياسى استىرتىن وپەراتسيا كەزىندە جوعالعان 14 جاستاعى بالانى تاپقاننان كەيىن بۇيرەك ساۋداسىمەن اينالىساتىن تاعى ءبىر توپتى قۇرىقتادى.
اۆتور
ەركەجان سماعۇلوۆا