عاني بەيسەمبايەۆ جامبىل وبلىسىنداعى مەكتەپتە بولعان وقيعاعا قاتىستى پىكىر ءبىلدىردى

استانا. KAZINFORM - ق ر وقۋ-اعارتۋ ءمينيسترى عاني بەيسەمبايەۆ جامبىل وبلىسىنداعى مەكتەپكە بوگدە ادامداردىڭ كەلۋى جانە مۇعالىمدەردەن اقشا جيناۋ وقيعاسىنا قاتىستى پىكىر ءبىلدىردى.

بۇگىن ۇكىمەت ۇيىندە بولعان باسپا ءسوز ءماسليحاتىندا تىلشىلەر مينيستردەن تەرەڭوزەك اۋىلىنداعى مەكتەپتە بولعان وقيعادان كەيىن مەكتەپ ديرەكتورى مەن تاربيە ءىسى جونىندەگى ورىنباسارى جۇمىستان كەتۋى وقيعاسىنا قاتىستى سۇراق قويدى.

«نەگە بۇل وقيعا بويىنشا تەكسەرۋ ۇزاققا سوزىلدى؟ تاربيە ءىسى جونىندەگى ورىنباسار ديرەكتوردىڭ عانا بۇيرىعىن ورىندايتىنى بەلگىلى. سول اۋىلدىڭ تۇرعىندارى تاربيە ءىسى جونىندەگى ورىنباساردى وتە بىلىكتى مامان دەپ باعالاپ وتىر. بۇل رەتتە جاۋاپكەرشىلىك كىمدە؟»، - دەپ سۇرادى جۋرناليست.

ءوز كەزەگىندە ع. بەيسەمبايەۆ وسىعان دەيىن ءبىلىم بەرۋ ۇيىمدارىندا بوگدە ادامداردىڭ قاتىسۋىمەن ءىس-شارالار ۇيىمداستىرۋعا تىيىم سالىنعانىن ەسكە سالدى.

«بۇل تۇرعىدا قاتاڭ ەسكەرتۋلەر جاسالعان ەدى. سەبەبى مەكتەپ وقۋ-تاربيە ىسىمەن اينالىسۋى كەرەك. سوندىقتان مەكتەپكە بوتەن ادامداردىڭ كىرۋىنە قاتىستى شەكتەۋ قوياتىن تالاپتار بار. مەكتەپتە بولاتىن ءىس-شارالاردىڭ بارلىعىنا وقۋ ورنىنىڭ ءبىرىنشى باسشىسى جاۋاپتى. جەرگىلىكتى اتقارۋشى ورگانداردا ءتيىستى زەردەلەۋ جۇمىستارىنان كەيىن ءتيىستى شەشىم جاسالدى. ولار تولىققاندى تەكسەرگەننەن كەيىن، مەكتەپ باسشىسى جازالاندى»، - دەدى مينيستر.

سونىمەن قاتار ول مەكتەپ ديرەكتورىنىڭ تاربيە ءىسى جونىندەگى ورىنباسارىنا قاتىستى قابىلدانعان شەشىمنىڭ قانشالىقتى ورىندى بولعانىن قايتا قاراۋعا تاپسىرما بەرگەنىن ايتتى.

«كەز كەلگەن مىقتى ماماندى باعالاۋىمىز كەرەك. اتاپ ايتقاندا، راسىندا دا ول ادامنىڭ تىكەلەي قاتىسى بولسا، قانداي مىقتى مامان اتانسا دا جاۋاپكەرشىلىكتى موينىنا الۋى كەرەك. دەگەنمەن، بۇل ماسەلەدە ورىنباسارىنا قاتىستى تاعى دا زەردەلەيمىز»، - دەدى عاني بەيسەمبايەۆ.

بۇدان بۇرىن بۇقارالىق اقپارات قۇرالدارىندا جامبىل وبلىسى تەرەڭوزەك اۋىلىنداعى مەكتەپتە بولعان وقيعانىڭ ۆيدەوسى تاراپ كەتكەن ەدى. وندا «توميريس» لاقاپ اتىمەن بەلگىلى باقسى كەلگەنى ايتىلعان.

اۆتور
رۋسلان عابباسوۆ