عاني بەيسەمبايەۆ: بۇگىن 90 مىڭعا جۋىق وقۋشى سۋ جاڭا مەكتەپتە وقۋ جىلىن باستايدى

استانا. KAZINFORM – ق ر وقۋ-اعارتۋ ءمينيسترى عاني بەيسەمبايەۆ قازاقستان حالقىن ءبىلىم كۇنىمەن قۇتتىقتادى.

مينيستر مەملەكەت وقۋشىلاردىڭ ساپالى ءبىلىم، سانالى تاربيە الۋى ءۇشىن بارلىق جاعدايدى جاساپ جاتقانىن، بۇگىن 90 مىڭعا جۋىق وقۋشى سۋ جاڭا مەكتەپتەردە وقۋ جىلىن باستايتىنىن اتاپ ءوتتى.

«قادىرلى ۇستازدار، اتا-انالار جانە وقۋشىلار! بۇگىن 2024-2025 وقۋ جىلىنىڭ جاڭا پاراعى اشىلدى. ەلىمىزدىڭ بارلىق وڭىرلەرىندە ءبىلىم كۇنىن اسىعا كۇتكەن 3,9 ميلليون بالا سۇيىكتى مەكتەبىمەن، ۇستازدارىمەن قايتا قاۋىشتى. مەملەكەت وقۋشىلاردىڭ ساپالى ءبىلىم، سانالى تاربيە الۋى ءۇشىن بارلىق جاعدايدى جاساپ جاتىر. بۇگىن 90 مىڭعا جۋىق وقۋشى سۋ جاڭا مەكتەپتەردە وقۋ جىلىن باستايدى. ونىڭ ىشىندە «جايلى مەكتەپ» ۇلتتىق جوباسىمەن سالىنعاندارى دا بار. ال 200 مىڭنان استام بالا كۇردەلى جوندەۋدەن ءوتىپ، قايتا جابدىقتالعان مەكتەپتەردە ءبىلىم الادى. 1- قىركۇيەك - العاش رەت مەكتەپ تابالدىرىعىن اتتاعان بالالار ءۇشىن ەرەكشە مەرەكە. ءبىرىنشى سىنىپقا 352 مىڭ بالا قابىلداندى.

ال 11 -سىنىپقا وتكەن 219 مىڭ وقۋشى مەكتەپتەگى وقۋىن اياقتايدى. قىمباتتى بالالار، وقۋ جىلى سىزدەردى جاڭا جەتىستىكتەرگە جەتەلەپ شابىتتاندىراتىن قىزىقتى، تانىمدى ءارى تاعىلىمدى بولسىن دەپ تىلەيمىن! ءدال وسى كۇنى ۇستازداردىڭ وسكەلەڭ ۇرپاققا ءبىلىم مەن تاربيە بەرۋدەگى وراسان ەڭبەگىن دە اتاپ وتكىم كەلەدى. ۇلتتىڭ اعارتۋشى ۇلى تۇلعاسى احمەت بايتۇرسىن ۇلى «ۇستاز - ۇلت كەلبەتى» دەپ بەكەر ايتپاسا كەرەك. سوندىقتان اعارتۋشىلىق ميسسياسىن ادال اتقارىپ جۇرگەن ۇستازداردىڭ ەڭبەگى لايىقتى تۇردە جوعارى باعالانۋى ءتيىس. قۇرمەتتى ارىپتەستەر، ءوز ماماندىقتارىڭىزعا ادالدىقتارىڭىز، ۇرپاق ىسىندەگى جانكەشتى ەڭبەكتەرىڭىز ءۇشىن العىسىمدى بىلدىرەمىن. سىزدەر بالالارعا ءبىلىم بەرىپ قانا قويماي، ولارعا حالقىمىزدىڭ باستى قۇندىلىقتارىن ءسىڭىرىپ كەلەسىزدەر. بيىلعى وقۋ جىلى جوعارى جەتىستىكتەر مەن تولاعاي تابىستارعا تولى بولسىن! ءبىلىم كۇنى قۇتتى بولسىن!» - دەلىنگەن مينيستر قۇتتىقتاۋىندا.

بۇعان دەيىن جاڭا وقۋ جىلىندا قانداي وزگەرىستەر بار ەكەنىن جازعان بولاتىنبىز.

اۆتور

ەلميرا ورالبايەۆا