عالىمدار وزدىگىنەن جويىلاتىن پلاستيك ويلاپ تاپتى

استانا. قازاقپارات - الەمدە جىل سايىن 57 ميلليون توننا پلاستيكالىق قالدىق قوقىسقا تاستالادى. اسىرەسە جىلىنا 10 ميلليون توننا قالدىق شىعاراتىن نيۋ-دەلي، لاگوس، لۋاندا سياقتى شاھارلاردا لاستانۋ دەڭگەيى وتە جوعارى. ال مۇنىڭ الدىن الۋدىڭ جولى - قوقىستى قايتا كادەگە جاراتۋ.

گازا سەكتورىندا جەرگىلىكتى حالىق پلاستيكتى وتىنعا اينالدىرا باستادى. ولار قاقتىعىس كەزىندە قيراعان عيماراتتار مەن ۇيلەردەن كۇندەلىكتى پلاستيكالىق قالدىقتاردى جيناپ، ونى وڭدەپ، تاۋلىگىنە شامامەن 50-60 ليتر جانارماي ءوندىرىپ شىعارادى. ليترىن 9 دوللاردان ساۋدالاۋدا. پالەستينالىقتار بۇل باستامانى وزدەرىن قاجەتتى وتىنمەن قامتاماسىز ەتىپ، ونسىز دا قاقتىعىس سالدارىنان قوقىس باسقان ورتانى لاستاماي، تازا ۇستاۋ ءۇشىن جۇزەگە اسىرىپ وتىر.

ماحمۋد موسلەح، جەرگىلىكتى تۇرعىن:

- پلاستيكالىق قالدىقتاردى قولمەن ۇساقتايمىز. جارىقتىڭ جوقتىعىنان بارلىعىن سولاي جاساۋعا تۋرا كەلەدى. قيراعان ۇيلەردىڭ قالدىقتارىن جيناقتاپ، وڭدەۋ جۇمىسىنا قاجەتتىسىن سورتتاپ، تاڭداپ الامىز. وسىلاي كۇندەلىكتى وزىمىزگە قاجەتتى جانارمايدى شىعارىپ الامىز.

امەريكاندىق عالىمدار وزدىگىنەن جويىلاتىن پلاستيك ويلاپ تاپتى

امەريكاندىق عالىمدار وزدىگىنەن جويىلاتىن پلاستيك ويلاپ تاپتى. بۇل ءادىس ەڭ قاتتى پلاستماسسا ءتۇرى پوليۋرەتاندى جەيتىن باكتەريانىڭ كومەگىمەن جۇزەگە اسىرىلادى. پلاستيككە ەنگىزىلگەن زيانكەس بەلسەندى تۇردە پوليۋرەتاننىڭ قۇرىلىمىن بۇزادى. بۇل ونىڭ قىسقا مەرزىمدە وزدىگىنەن ىدىراۋىنا مۇمكىندىك بەرەدى. سونداي-اق قورشاعان ورتاعا زيان كەلتىرمەي، جاھاندىق لاستانۋ ماسەلەسىن شەشۋدە ماڭىزدى قادام بولۋى مۇمكىن، - دەيدى ماماندار.

كاليفورنيادا پوليەتيلەن پاكەت قولدانۋعا تىيىم سالىنادى

ال كاليفورنيا شتاتىندا كەلەر جىلدان باستاپ ساۋدا جاساۋ كەزىندە پوليەتيلەن پاكەتتەرىن قولدانۋعا تىيىم سالىنادى. ساۋدا ورىندارىندا كوپ رەتتىك سومكەسى جوق تۇتىنۋشىلار ءۇشىن قاعاز پاكەتتەر ۇسىنىلادى. بيلىك پوليەتيلەن سيرەك وڭدەلەدى، كەيدە ءتىپتى، قايتا وڭدەۋگە كەلمەيدى. جۇزدەگەن جىلدار بويى ىدىراپ، مۇحيتتار مەن توپىراقتى لاستايدى دەيدى. ۇكىمەت مۇنىڭ الدىن الىپ، قورشاعان ورتاعا زيان كەلتىرمەۋ ءۇشىن جاڭا زاڭدى قولدانىسقا ەنگىزگەلى وتىر.

24.kz