عالىمدار وتقا جانبايتىن، رادياتسياعا توزبايتىن، ايازعا قاتپايتىن كابەلدەر ويلاپ تاپتى
استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ۇكىمەت وتىرىسىنان كەيىن وتكەن باسپا ءسوز ءماسليحاتىندا قازاقستاندىق عالىمدار ويلاپ تاپقان وتقا جانبايتىن كابەلدى تانىستىردى.
- «قازەلەكتروماش» دەگەن ۇلكەن زاۋىتىمىز بار، وندىرىستىك كومپانيا. ولار قۇرىلىسقا، وندىرىستىك كومپانيالارعا، تەمىرجولعا، اۋەجايعا قاجەتتى مىنانداي كابەلدەر شىعارادى. بىزدە الماتىداعى يادرولىق ينستيتۋت، كۋرچاتوۆتاعى ۇلتتىق يادرولىق ورتالىق، ەۋرازيا ۋنيۆەرسيتەتىندەگى ورتالىق سياقتى بىرنەشە قىزىق زەرتحانا بار. ەۋرازيا ۋنيۆەرسيتەتىندەگى ۇلكەن قوندىرعى ارقىلى وسى كابەلدىڭ فيزيكالىق قاسيەتىن وزگەرتۋگە مۇمكىندىك الدىق، - دەدى ول.
«قازەلەكتروماشتىڭ» تاپسىرىسىمەن قولعا العان جوبانىڭ ءونىمىن وزبەكستان ءبىرىنشى بولىپ ساتىپ العان.
- «قازەلەكتروماش» كومپانياسىنا ايتقانىمىزدا، «وتقا جانبايتىن كابەل كەرەك» دەگەندى ايتتى. ويتكەنى وندىرىستەگى ورتتەردىڭ نەگىزگى سەبەبى - قىسقا تۇيىقتالۋ. كابەلدىڭ سىرتقى قاباتى بالقىپ، سودان وت تۇتانادى. سوندىقتان ءبىز وتقا سالسا جانبايتىن، بىقسىمايتىن كابەل جاساپ شىعاردىق. مۇنداي كابەلدەردىڭ العاشقى لەگى ەكسپورتقا شىعىپ تا ۇلگەردى. «وزبەك تەمىر جولدارى» ۇلتتىق كومپانياسى ۇلكەن تاپسىرىس بەرگەن، قازىر وسى ءونىمدى قولدانىپ ءجۇر. ودان كەيىن بىزدە سۋىققا ارنالعان، تومەن تەمپەراتۋراعا شىدامدى، رادياتسياعا ءتوزىمدى كابەلدەر بار، - دەيدى ساياسات نۇربەك.
مينيستر اتالعان كابەلدىڭ وتقا توزىمدىلىگىن جۋرناليستەرگە كورسەتۋ ءۇشىن وتتىقپەن كۇيدىرگەن. اڭگىمەگە قىزۋ كىرىسىپ كەتكەن ساياسات نۇربەك وتتىقتىڭ شاقپاعى قىزعانىن بايقاماي قالىپ، ساۋساعىن كۇيدىرىپ تە الدى.
سونداي-اق، ول وسكەمەن عالىمدارى جاساپ شىعارعان تيتان يمپلانتتار وتاعا قولدانىلا باستاعانىن ايتتى.
اۆتور
ەسىمجان ناقتىباي
