عالىمدار قازاق تىلىنە وتە جاقىن ساحا ءتىلىن زەرتتەپ جاتىر

قازاق تۇركولوگتارى ەجەلگى تۇرىك ءتىلىنىڭ تابيعاتىن تانۋ ءۇشىن ءسىبىر تۇركىلەرىن تەرەڭ زەرتتەپ جاتىر.

«ەۋرازيا كەڭىستىگىن تولىق قامتىعان تۇرىك الەمىنىڭ ءبىر بولىگى ساحالارمەن لينگۆيستيكا سالاسىندا قارىم- قاتىناستاردى نىعايتۋ قاجەت»، - دەيدى عالىمدار. تالدىقورعانان كەلگەن مارات رىسقۇلوۆ وسىدان ءۇش جىل بۇرىن ياكۋتسكتەگى ءسىبىر-شىعىس فەدەرالدى ۋنيۆەرسيتەتىن تۇركولوگيا ماماندىعى بويىنشا ءتامامداعان. ال بيىل ءىلياس جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ دوكتورانتى رەتىندە ساحا رەسپۋبليكاسىندا تاعىلىمدامادان ءوتىپ جاتىر.
«ءسىبىر تۇركىلەرى ىشىندە ساحا حالقىنىڭ ءتىلى قازاق تىلىنە وتە جاقىن. تاريحى مەن ەتنوگرافياسىنان الارىمىز كوپ»، - دەيدى عالىم.
مارات رىسقۇلوۆ، ءى.جانسۇگىروۆ اتىنداعى ج م ۋ دوكتورانتى:
- ساحا ءتىلى - جالپى تۇركى ءتىلىنىڭ تۇپكى تامىرىن ۇزبەي، بۇزباي كەلە جاتقان ءتىلدىڭ ءبىرى. سوندىقتان ول زەرتتەلۋ كەرەك. ەكى ەلىمىزدىڭ اراسىنداعى ءتىل جانىنداعى بايلانىسىمىز دامىسا، ءال- فارابي اتىنداعى ۋنيۆەرسيتەتتە ساحا ءتىلىنىڭ كافەدراسىن اشساق پا دەگەن ارمانىمىز دا بار. ويتكەنى ول جاقتا ساحا ءتىلىن وقيمىن، ۇيرەنەمىن دەگەن جاس تا كوپ.
قازاقستاندىق ماماندار ساحا ءتىلىن ۇيرەنۋگە قىزىعۋشىلىق تانىتسا، ياكۋتيادا تۇراتىن قانداستارىمىز قازاق ءتىلىن ۇمىتپاۋعا تىرىسادى. ماسەلەن، وسىدان وتىز جىل بۇرىن التايدان ياكۋتيا قونىس اۋدارعان گۇلنار سادىقوۆا ساحاداعى قازاقتاردىڭ باسىن قوسىپ، سالت- ءداستۇردى ساقتاپ، جاستارعا انا ءتىلىن ۇيرەتۋ ءۇشىن بارىن سالىپ ءجۇر.
گۇلنار سادىقوۆا، ياكۋتسك تۇرعىنى:
- قازاقستاننان، ەلىمىزدەن قازاقتار كەلىپ جاتقانىنا رازىمىز. ال وسى جاقتا ءبىز ءوزىمىزدىڭ قازاعىمىزدىڭ ەلىمىز، جەرىمىز دەپ ۇمىتپاي، بالالارىمىزعا قازاقشا ۇيرەتەمىز. ءبىراق سونىڭ ءوزى جەتكىلىكسىز. قازاقستاننان كوبىرەك ادام كەلىپ، ءبىزدىڭ بالالارىمىزعا وقىتىپ، ونلاين دا وقىتسا دەيمىز.
بيىل عانا حالىق سانى 1 ميلليونعا جەتكەن ەلدە بۇگىن دە 1 مىڭنان استام قازاق ءومىر سۇرەدى. قانداستارىمىزدىڭ سانى از بولسا دا، ياكۋتياداعى قازاق قوعامدىق ۇيىمى وتىز جىلدا ءبىر كۇنگە دە جۇمىسىن توقتاتقان ەمەس.
اۆتورلار: دانا نۇرجان، شاحزود گاميروۆ