عالىمدار شەگىرتكەنى شەتەلگە ساتۋدى ۇسىنىپ وتىر
استانا. قازاقپارات - شەگىرتكە ءبىر اۋىلدا قىرىلعانمەن، قالعانى ۇدەرە كوشىپ، باسقا ءبىر القاپقا قونادى. قاپتاعان جاندىكتەن قۇتىلۋدىڭ امالى: شەتەلگە ساتىپ، پايدا تابۋ كەرەك. وتاندىق عالىمدار ۇكىمەتكە ارنايى ۇسىنىس ازىرلەپ جاتىر.
جىبىرلاعان جاندىكتى وزىمىزدە مال ازىعىنا پايدالانۋعا بولسا، جات جۇرتتا ادامدار جەي بەرەدى. شەگىرتكەنى اۋلاپ، شەتەلگە ساتۋ كەرەك. قازاقستاندىق عالىمدار جاندىكتى اۋلاۋ تەحنولوگياسىن جاساۋعا دايىن وتىر. ەگەر ۇكىمەت قولداسا، شىرىلداۋىق شەگىرتكە تابىستىڭ كوزىنە اينالادى.
باۋىرجان قاسەنوۆ، «ۇلتتىق اگرارلىق عىلىمي- ءبىلىم بەرۋ ورتالىعى» ك ە ا ق باسقارما ءتوراعاسى:
- شەگىرتكەمەن كۇرەس تەك حيميالىق ۋلاۋمەن قانا كۇرەس بولماۋى كەرەك. ونىڭ دا پايداسىن كورۋ كەرەك. مىسالى، شەگىرتكەنى قىتايدا، تايلاندتا جەيدى. سول تايلاندتا 1 كەلى شەگىرتكەنىڭ باعاسى 7 مەن 10 دوللاردىڭ اراسىندا تۇرادى. سوعان قاراعاندا نەگە ءبىز ونى پايدالانبايمىز؟ ءبىزدىڭ ماقسات نيدەرلاندى سياقتى جەكە فەرما ارقىلى اقشا سالىپ، كوبەيتۋ ەمەس.
عالىمنىڭ ايتۋىنشا، قازىر شەگىرتكەنى 2 ميللياردتان استام ادام جەيدى. اسىرەسە وڭتۇستىك- شىعىس ازيادا سۇرانىس زور. سونىمەن قاتار اگروونەركاسىپ كەشەنىندە كەڭىنەن پايدالانۋعا بولادى.
باۋىرجان قاسەنوۆ، «ۇلتتىق اگرارلىق عىلىمي- ءبىلىم بەرۋ ورتالىعى» ك ە ا ق باسقارما ءتوراعاسى:
- بالىققا، تاۋىققا، مالعا دەگەندەي جەمشوپ قوسپالارى رەتىندە پايدالانساق، ءبىزدىڭ اۋىل شارۋاشىلىعىنىڭ كوپ پروبلەماسى شەشىلەدى. مىسالى، اقۋىزدىڭ شەگىرتكەدەگى ۇلەسى - %70، ەتتە، قارا مالدىڭ ەتىندە %20-25 بولسا، 3 ەسە ارتىق.
دەگەنمەن شەگىرتكەنى اۋلايتىندار كوبەيسە، قۇرىپ كەتۋى دە مۇمكىن. ماماندار: «بۇل ەكولوگياعا كەسىرىن تيگىزەدى»، - دەپ وتىر.
عاني نازاربەك، «بايتاق بولاشاق» رەسپۋبليكالىق ەكولوگيالىق اليانسىنىڭ پرەزيدەنتى:
- ماسەلەن، ءبىزدىڭ قازاقستاندا 527 قۇستىڭ ءتۇرى بولسا، ونىڭ ىشىندە جارتىسىنان كوبى وسى شەگىرتكەمەن قورەكتەنەدى. ودان دا بولەك، بىزدە باسقا دا باۋىرمەن جورعالاۋشىلار نەمەسە كەمىرۋشىلەر وتريادىنداعى شەگىرتكەمەن قورەكتەنەتىن جانۋارلار بار. وتە كوپتەگەن تۇرگە شەگىرتكە نەگىزگى ازىقتىق قور بولىپ ەسەپتەلەدى. ءبىراق شەگىرتكەنىڭ دە تابيعاتتا شامادان تىس كوپ بولۋى - ول دا ۇلكەن زيان.
«كەيىنگى جىلدارى كليمات جىلىنعانىنان شەگىرتكە كوبەيىپ كەتتى»، - دەيدى ەكولوگ. الداعى جىلدارى دا شەگىرتكە قالىڭ بولۋى مۇمكىن. ال وتاندىق عالىمدار ونىڭ كوزىن جويۋعا قىرۋار قارجى جۇمساماي-اق، شەتەلگە ساتۋدى ۇسىنىپ وتىر.
اۆتورلارى: نۇرقانات قاناپيا، دياس قوبلانبايەۆ.
24.kz
