عالىمدار بيدايدىڭ جاڭا سۇرپىن شىعاردى

استانا. قازاقپارات - اقمولا وبلىسىندا عالىمدار قۇرعاقشىلىق پەن ءتۇرلى اۋرۋلارعا ءتوزىمدى بيدايدىڭ جاڭا سۇرپىن شىعاردى، دەپ حابارلايدى 24KZ.

ول ايماقتىڭ كليماتتىق جاعدايىنا تولىق سايكەس كەلەدى. جاڭا سۇرىپتىڭ ارتىقشىلىعى مەن كەمشىلىگى ارنايى القاپتاردا سىنالادى. جان-جاقتى تەكسەرىستەن وتكەن سوڭ عانا وندىرىسكە جولداندى. شورتاندى 24. اقمولالىق عالىمدار جاڭا تۇقىم سۇرپىن وسىلاي اتاعان. ونىڭ ەرەكشەلىگى: قۋاڭشىلىققا شىدامدى، اۋرۋلارعا ءتوزىمدى. قازىر زەرتحانالىق جاعدايدا سىناقتاردان ءوتىپ جاتقان جاڭا تۇقىم ەندى 3-4 جىلدان كەيىن عانا ەگىس القابىنا سەبىلەدى. عالىمدار بۇل سۇرىپتىڭ الداعى ۋاقىتتا جوعارى سۇرانىسقا يە بولاتىنىنا سەنىمدى.

ەلجاس قايىرجانوۆ، ا. بارايەۆ اتىنداعى استىق شارۋاشىلىعى عىلىمي-وندىرىستىك ورتالىعىنىڭ ءبولىم مەڭگەرۋشىسى:

- 2024 -جىلى ءبىرىنشى جىل سىناقتان ءوتتى. ءالى 2 جىل سىناقتان وتەدى. ول سورتتىڭ دا بولاشاعى زور دەپ ويلايمىن. ونىمدىلىگى وتە جوعارى. ساپا كورسەتكىشتەرى بويىنشا جاقسى سورت.

ال وسىدان بىرنەشە جىل بۇرىن عالىمداردىڭ تاجىريبەلىك سىنامالارى ارقىلى شىعارعان «تايماس» سۇرپى جان-جاقتى تەكسەرىستەن ءوتىپ، وندىرىسكە جولداندى. ەندى بۇل داقىلدى ايماقتىڭ كەز كەلگەن ديقانى ءوز القابىندا سەبە الادى. بىلتىر عىلىمي-وندىرىستىك ورتالىعىنىڭ عالىمدارى «تايماس» تۇقىمىن 100 گەكتار القاپقا سەۋىپ، گەكتارىنا 35 سەنتنەردەن ءونىم العان. سونداي-اق جاڭا سۇرىپ ارقىلى عىلىم قورىنان ارنايى گرانت ۇتىپ الىپتى.

ەلجاس قايىرجانوۆ، ا. بارايەۆ اتىنداعى استىق شارۋاشىلىعى عىلىمي- وندىرىستىك ورتالىعىنىڭ ءبولىم مەڭگەرۋشىسى:

- ءۇش جىلعا 300 ميلليون تەڭگە قاراجات ءبولىندى. سول بويىنشا جاڭا تەحنيكا الدىق. تازالاۋ قۇرىلعىلارىن الدىق. ياعني ەڭ باستى ماقسات - سول سورتتىڭ %100 تازالىعىن ساقتاپ، ەليتالى وريگينالدى تۇقىم شىعارىپ، شارۋاشىلىقتارعا ەنگىزۋ. ءبىز شارۋالارعا ءارتۇرلى تۇقىم سۇرىپتارىن ۇسىنامىز. مىسالى، القاپ ىلعالدى بولسا، وندا كوبىنەسە مايلى داقىلدار ەگۋگە كەڭەس بەرەمىز. جاڭا تۇقىم سۇرپىن شىعارۋداعى ءبىزدىڭ ماقساتىمىز - ەگىن شىعىنىن ازايتىپ، شىعىمدىلىعىن ارتتىرۋ. ياعني ءونىم كولەمىن ۇلعايتۋ.

«جالپى ءداستۇرلى ادىسپەن ءبىر جاڭا سۇرىپتى شىعارۋ ءۇشىن كەمىندە 15 جىلعا دەيىن ۋاقىت كەتەدى. ال سوڭعى جىلدارى قولدانىلىپ جۇرگەن بيوتەحنولوگيالىق ءادىس بويىنشا بۇل مەرزىمدى 2 ەسەگە قىسقارتۋعا بولادى»، - دەيدى ماماندار.

ايتا كەتەيىك، اتالعان ورتالىق وسى ۋاقىتقا دەيىن ءداندى داقىلداردىڭ 100-دەن استام ءتۇرىن شىعارعان. ودان بولەك، ولاردىڭ جاساعان توپىراقتى قورعاۋ جۇيەسى ەلىمىزدە عانا ەمەس، الىس-جاقىن شەت ەلدەردە دە كەڭىنەن قولدانىلادى.

24.kz